ಪೊಂಪೈ ಬಿ ವಾಡ್ಯಾಚೆಂ ಯಾತ್ರಿಕ್ ಪಯ್ಣ್

ಪೊಂಪೈ ಬಿ ವಾಡ್ಯಾಚೆಂ ಯಾತ್ರಿಕ್ ಪಯ್ಣ್ 2025ವ್ಯಾ ಎಪ್ರಿಲ್ ಮಹಿನ್ಯಾಚಾ 6 ತಾರಿಕೆರ್ ಆಯ್ತಾರಾ ಸಕಾಳಿಂಚಾ ಮಿಸಾ ನಂತರ್ 9 ವೊರಾರ್ ವಾಡ್ಯಾಗಾರಾಂ ಶ್ರೀಮಾನ್ ಆಲ್ವಿನ್ ಪೆರಿಸ್‌ ಹಾಂಚ್ಯಾ ಘರಾ ಕಾಫಿ ಫಳ್ಹಾರ್ ಸ್ವೀಕಾರ್ ಕರುಂಕ್ ಸಾಂಗಾತಾ ಜಮ್ಲ್ಯಾಂವ್. 9.30 ವೊರಾರ್ ಕೈಕಂಬ ಥಾವ್ನ್ ಬಸ್ಸಾರ್ ಮಂಜೇಶ್ವರ್ ಸ್ನೇಹಾಲಯ ಆಶ್ರಮಾಕ್ ಪಯ್ಣ್ ಆರಂಭ್ ಕೆಲೆ. ಗುರ್ಕಾರ್ ಶ್ರೀಮಾನ್ ಪ್ರವೀಣ್ ಲೋಬೊ, ಪ್ರತಿನಿಧಿ ಶ್ರೀಮಾನ್ ಹೆನ್ರಿ ಸಿಕ್ವೇರಾ, ಧರ್ಮ್ ಭಯ್ಣಿಂ ರೋಜ್ ಲೀಟಾ, ಭ.ವಿಲ್ಮಾ ಆಶೆಂ 47 ವಾಡ್ಯಾಗಾರಾಂ ಹಾಜರ್ ಆಸ್ಲಿಂ. 11 ವೊರಾರ್ ಸ್ನೇಹಾಲಯಕ್ ಪಾವ್ಲ್ಯಾಂವ್. ಸ್ನೇಹಾಲಯಾಚೊ ನಿರ್ದೇಶಕ್ ಬ್ರದರ್ ಜೋಸೆಫ್ ಕ್ರಾಸ್ತಾನ್ ಆಮ್ಕಾಂ ಬರೊ ಎವ್ಕಾರ್ ಮಾಗ್ಲೊ. ವಾಡ್ಯಾಗಾರಾಂ ಥಾವ್ನ್ ಜಮೊ ಜಾಲ್ಲಿ ವೊರ್ವಿಂ ಸಂಸ್ಥ್ಯಾಕ್ ಹಾತಾಂತರ್ ಕೆಲ್ಯೊ. ಸ್ನೇಹಾಲಯ ಸಂಸ್ಥ್ಯಾಚಾ ಸ್ಥಾಪನಾವಿಶಿಂ ವೀಡಿಯೊ ಮಾರಿಫಾತ್ ಮಟ್ವಿ ಝಳಕ್ ದಿಲಿ. ಬ್ರದರ್ ಜೋಸೆಫ್ ಹಾಣಿಂ ಸ್ನೇಹಾಲಯ ಸಂಸ್ಥ್ಯಾವಿಶಿಂ ಮಾಹೆತ್ ದಿಲಿ. ಶ್ರೀಮತಿ ಲವಿಟ ಡಿಸೋಜ ಹಿಣೆಂ ಸ್ನೇಹಾಲಯ ಸಂಸ್ಥ್ಯಾಚಾ ನಿರ್ಗತಿಕ್, ಮಾನಸಿಕ್ ಅಸ್ವಸ್ಥ್ ಜಾಲ್ಲಾಂಚಿ ಭೆಟ್ ಕರ್ನ್ ತಾಂಚೆ ಕಡೆ ಉಲಂವ್ಕ್ ಆವ್ಕಾಸ್ ಕರ್ನ್ ದಿಲೊ. ಜುಸ್ತ್ 1 ವೊರಾರ್ ಜೆವಾಣ್ ಸ್ವೀಕಾರ್ ಕರ್ನ್, ದನ್ಪಾರಾ 2 ವೊರಾರ್ ಥಾವ್ನ್ 3.30 ವೊರಾಂ ಪರ್ಯಾಂತ್ ವಾಡ್ಯಾಗಾರಾನಿಂ ತಶೆಂಚ್ ತ್ಯಾ ಸಂಸ್ಥ್ಯಾಚಾನಿಂ ಮನೊರಂಜನ್ ಕಾರ್ಯೆಂ ಸಾದರ್ ಕೆಲೆಂ. ಶ್ರೀಮತಿ ರೆನ್ನಿ ಪೆರಿಸ್ ಆನಿ ಪಂಗ್ಡಾನ್ ಮಾಗ್ಣ್ಯಾ ಗಿತಾಂ ದ್ವಾರಿಂ ಕಾರ್ಯೆಂ ಸುರ್ವಾತ್ ಕೆಲೆಂ. ಶ್ರೀ ವಿಜಯ್ ರಸ್ಕೀನ್ಹಾ, ಶ್ರೀ ಶಮನ್ ಡಿಕುನ್ಹಾ ಹಾಂಚ್ಯಾ ಮುಖೇಲ್ಪಣಾಖಾಲ್ ವಿಭಿನ್ನ್ ಸಂಗೀತ್ ವಾದ್ಯಾಂ ವಾಜವ್ನ್ ಪೊದಾಂ ಸಾದರ್ ಕೆಲಿಂ. ಶ್ರೀಮತಿ ಅನ್ಸಿಲ್ಲಾ ಪೆರಿಸ್ ಹಿಚಾ ಮುಖೇಲ್ಪಣಾಖಾಲ್ ನಾಚ್ಪಾಂಚೆ ಪ್ರದರ್ಶನ್ ಜಾಲೆಂ. ಶ್ರೀ ಓಸ್ವಾಲ್ಡ್ ಪೆರಿಸ್ ಹಾಣಿಂ ಏಕ್ ಪೋದ್ ಗಾಯ್ಲೆಂ. ಶ್ರೀಮತಿ ಡೆಲ್ಸಿ ರೊಡ್ರಿಗಸ್ ಹಿಣೆಂ ಸಂಸ್ಥ್ಯಾಚಾ ಸಾಂದ್ಯಾಂಕ್ ಥೊಡೆ ಮನರಂಜನ್ ಖೆಳ್ ಖೆಳವ್ನ್ ಕಾರ್ಯೆಂ ನಿರೂಪಣ್ ಕೆಲೆಂ. ಖೆಳ್ ಖೆಳಂವ್ಕ್ ಶ್ರೀ ಜೈಸನ್ ಪೆರಿಸ್ ಆನಿ ಶ್ರೀಮತಿ ಜಾನೆಟ್ ಪಿಂಟೊನ್ ಸಹಕಾರ್ ದಿಲೊ. ಭ.ವಿಲ್ಮಾ ಹಿಣೆಂ ಸಂಸ್ಥಾಚ್ಯಾ ಸಿಬ್ಬಂದಿನ್ ದಿಂವ್ಚಾ ಸೆವೆಕ್ ಉಗ್ಡಾಸಾಚಿ ಕಾಣಿಕ್ ದೀವ್ನ್ ಮಾನ್ ಅರ್ಪಿಲೊ. ಶ್ರೀ ಪ್ರವೀಣ್ ಲೋಬೊ, ಭ.ವಿಲ್ಮಾ, ಶ್ರೀಮತಿ ಜಾನೆಟ್ ಪಿಂಟೊ ಆನಿ ಶ್ರೀಮತಿ ಡೆಲ್ಸಿ ರೊಡ್ರಿಗಸ್ ಹಾಣಿಂ ಸಂಸ್ಥ್ಯಾವಿಶಿಂ ತಾಂಚಿ ಭೊಗ್ಣಾಂ ಉಚಾರ್ನ್ ಬರೆಂ ಮಾಗ್ಲೆಂ. ಗುರ್ಕಾರಾನ್ ವಾಡ್ಯಾಗಾರಾಂ ಥಾವ್ನ್ ಜಮೊ ಜಾಲ್ಲೆ ರು.26000 ಐವಜ್ ಸಂಸ್ಥ್ಯಾಕ್ ದಿಲೆ. ಚಾ ಪಿಯೆವ್ನ್ ಥಂಯ್ ಥಾವ್ನ್ ಸೋಮೇಶ್ವರ ದರ್ಯಾ ತಡಿಕ್ ವಚುನ್ ಇಲ್ಲೊ ವೇಳ್ ಪಾಶಾರ್ ಕೆಲೊ. ಬಸ್ಸಾರ್ ಪೊದಾಂ ಮ್ಹಣೊನ್ ಐಸ್ ಕ್ರೀಂ ಖಾವ್ನ್ ರಾತಿ 7.15 ವೊರಾರ್ ಕೈಕಂಬ ಪಾವ್ಲ್ಯಾಂವ್.