ತಾಳಿಯಾಂಚೊ ಆಯ್ತಾರ್ - 2025

ಜೆಜುನ್ ಕಷ್ಟ್ ಆನಿ ಖುರ್ಸಾಚೆಂ ಮರಣ್ ಸೊಸ್ಚ್ಯಾ ಪಯ್ಲೆಂ ಜೆರುಜಲೆಮ್ ಶ್ಹೆರಾಕ್ ಪ್ರವೇಶ್ ಜಾತಾನಾ ಲೊಕಾನ್ ತಾಳಿಯೊ ಘೆವ್ನ್ ಹೊಸಾನ್ನಾ ದಾವಿದಾಚ್ಯಾ ಪುತಾ ಮ್ಹಣ್ ವ್ಹಡ್ ತಾಳ್ಯಾನ್ ಬೋಬ್ ಮಾರ್ನ್ ಸ್ವಾಗತ್ ಕೆಲ್ಲೆಂ ಆನಿ ಜೆಜುನ್ ಜೆರುಜಲೆಮ್ ಶ್ಹೆರಾಕ್ ಜಯ್ತೆವಂತ್ ಪ್ರವೇಶ್ ಕೆಲ್ಲೆಂ ಘಡಿತ್ ನಿಯಾಳ್ ಕರ್ನ್ ಆಮ್ಚ್ಯಾ ಫಿರ್ಗಜೆಂತ್ ಎಪ್ರಿಲ್ 13 ವೆರ್ ತಾಳಿಯಾಂಚೊ ಆಯ್ತಾರ್ ವ್ಹಡಾ ಸಂಭ್ರಮಾನ್ ಆನಿ ಭಕ್ತಿಪಣಿ ಸಂಭ್ರಮ್ಲೊ. ಆನಿ ಭಾಗೆವಂತ್ ಹಪ್ತ್ಯಾಚಿ ಸುರ್ವಾತ್ ಕೆಲಿ. ಸಕಾಳಿಂ 7:30 ವ್ಹರಾರ್ ಖುರ್ಸಾಗುಡ್ಯಾರ್ ಹಾಜರ್ ಆಸ್'ಲ್ಲ್ಯಾ ಸರ್ವ್ ಫಿರ್ಗಜ್‌ಗಾರಾಂ ಸಂಗಿಂ ಫಿರ್ಗಜ್ ವಿಗಾರ್ ಭೊ|ಮಾ|ರುಡೊಲ್ಫ್ ರವಿ ಡೆಸಾ ಬಾಪಾಂನಿ, ಮಾ|ಬಾ|ದೊ|ಪಿಯುಸ್ ಫಿಡೆಲಿಸ್ ಪಿಂಟೊ, ದಿಯಾಕೊನ್ ಬಾಪ್ ವಿಕಾಸ್ ಪಿರೇರಾ ಸವೆಂ ಮಾಗ್ಣ್ಯಾ ವಿಧಿ ಚಲವ್ನ್ ವರ್ನ್ ತಾಳಿಯೊ ಆಶಿರ್ವಾದಿತ್ ಕೆಲ್ಯೊ. ಆಶೀರ್ವಾದಿತ್ ಕೆಲ್ಲ್ಯೊ ತಾಳಿಯೊ ಘೆವ್ನ್ ಸರ್ವಾಂ ವ್ಹಡಾ ಭಕ್ತೆನ್ ಆನಿ ಶಿಸ್ತೆನ್ ಪುರ್ಶಾಂವಾರ್ ದೇವ್ ತೆಂಪ್ಲಾಕ್ ಯೇವ್ನ್ ಪವಿತ್ರ್ ಎವ್ಕರಿಸ್ತಾಚೆಂ ಬಲಿದಾನ್ ಭೆಟಯ್ಲೆಂ ಆನಿ ಜೆಜುಚ್ಯಾ ಕಷ್ಟಾ ಮರ್ಣಾಚೊ ಪಾಶಾಂವ್ ನಿಯಾಳ್ ಕೆಲೊ. ವಿಗಾರ್ ಬಾಪಾಂನಿ ಪ್ರಧಾನ್ ಯಾಜಕ್ ಜಾವ್ನ್ ಪವಿತ್ರ್ ಎವ್ಕರಿಸ್ತಾಚೆ ಬಲಿದಾನ್ ಭೆಟಯ್ಲೆಂ. ಮಾ।ದೊ। ಪಿಯುಸ್ ಫಿಡೆಲಿಸ್ ಪಿಂಟೊ ಬಾಪಾಂನಿ ಜೆಜು ಸಾಂಗಾತಾ ಜೆರುಜಲ್ಯಾಚಿ ವಾಟ್ ಚಮ್ಕುಯಾಂ ಮ್ಹಳ್ಳಾ ಸಂದೇಶಾಖಾಲ್ ಅರ್ಥಭರಿತ್ ಸೆರ್ಮಾಂವ್ ದೀಂವ್ನ್ ಕಸಲೊಚ್ಚ್ ಮಾನ್, ಅಧಿಕಾರ್, ಪದ್ವಿ ಆಶೆನಾತ್'ಲ್ಲ್ಯಾ ಜೆಜುನ್ ಜೆರುಜಲೆಮಾಕ್ ಜಯ್ತೆವಂತ್ ಪ್ರವೇಶ್ ಘೆತ್ಲೊ ಫಕತ್ತ್ ಮ್ಹನ್ಶಾಕುಳಾಕ್ ಜಿವಿತ್ ದಿಂವ್ಚ್ಯಾ ಸರ್ಗಿಂಚ್ಯಾ ಜೆರುಜಲ್ಯಾಚಿ ವಾಟ್ ದಾಕೊಂವ್ಚ್ಯಾಕ್, ಆಮಿಯ್ ಆಮ್ಚ್ಯಾ ಜಿವಿತಾಂತ್ ಕಸಲೊಚ್ಚ್ ಮಾನ್, ಪದ್ವಿ ಆಶೆನಾಸ್ತಾಂ, ಜಿವಿತಾಂತ್ ಕಷ್ಟ್ ಆಕಾಂತ್ ಆಯಿಲ್ಲ್ಯಾ ವೆಳಾರ್ ಭರ್ವಸ್ಯಾನ್ ಜಿಯೆಂವ್ಕ್ ಉಲೊ ದಿಲೊ. ದಿಯಾಕೊನ್ ಬಾಪ್ ವಿಕಾಸ್ ಪಿರೇರಾನ್ ಸಹ ಭೆಟವ್ಣಿ ಕೆಲಿ. ವಾಡ್ಯಾಚ್ಯಾ ಗುರ್ಕಾರಾಂನಿ ಲೋಕಾಂಕ್ ಜಾಯ್ ಪುರ್ತ್ಯೊ ತಾಳಿಯೊ ಹಾಡ್'ಲ್ಲ್ಯೊ . ಗೊವ್ಳಿಕ್ ಪರಿಷದೆಚ್ಯಾ ಸಾಂದ್ಯಾನಿಂ ಆನಿ ಕಥೊಲಿಕ್ ಸಭೆಚ್ಯಾ ಸಾಂದ್ಯಾಂನಿ ತಾಳಿಯೊ ವಾಂಟುಂಕ್ ತಶೆಂಚ್ ಫಿರ್ಗಜ್‌ಗಾರಾಂಕ್ ಖುರ್ಸಾಗುಡ್ಯಾರ್ ಮಾಂಡಾವಳಿನ್ ರಾವೊಂಕ್ ಆನಿ ಶಿಸ್ತೆನ್ ಪುರ್ಶಾಂವಾರ್ ವಚೊಕ್ ಸಹಕಾರ್ ದಿಲೊ. ಶೋನ್ ಫೆರ್ನಾಂಡಿಸ್ ಹಾಣಿಂ ತಸ್ವೀರ್ ಕಾಡ್ನ್ ಸಹಕರ್ ದಿಲೊ.