ನಿಮಾಣೊ ಸುಕ್ರಾರ್ - 2025

ಸೊಮ್ಯಾಂ ಜೆಜುಚೆ ಕಷ್ಟ್ ಆನಿ ಮರಣ್ ನಿಯಾಳ್ಚೊಂ ದೀಸ್. ಜೆಜುಚ್ಯಾ ಖುರ್ಸಾಮ್ಹಳಿ ಉಬಿಂ ರಾವೊನ್ ಕ್ರಿಸ್ತಾಚ್ಯಾ ಸಾಕ್ರಿಫಿಸಾಚಿ ಗುಂಡಾಯ್ ಆನಿ ಸಗ್ಳ್ಯಾ ಮ್ಹನ್ಶಾಕುಳಾಚೆ ಸೊಡ್ವಾಣೆಂ ಖಾತಿರ್ ಅಪ್ಲೊ ಜೀವ್ ದಿಲ್ಲ್ಯಾ ಸೊಡ್ವಣ್ದಾರಾಚೊ ಮೋಗ್ ನಿಯಾಳ್ಚೊ ದೀಸ್ ಮ್ಹಣ್ಜೆ ಭಾಗೆವಂತ್ ಹಫ್ತ್ಯಾಚೊ ನಿಮಾಣೊ ಸುಕ್ರಾರ್ ವ್ಹಡಾ ಭಕ್ತಿನ್ ಆನಿ ಮಾನಾನ್ ಆಚರಣ್ ಕೆಲೊ. ಸಾಂಜೆರ್ 4:00 ವ್ಹರಾರ್ ಜೆಜುಚ್ಯಾ ಕಷ್ಟಾ ಮರ್ಣಾಚೊ ನಿಯಾಳ್ ಕರ್ನ್ ಫಿರ್ಗಜ್ ವಿಗಾರ್ ಭೊ। ಮಾ। ರುಡೊಲ್ಫ್ ರವಿ ಡೆಸಾ ಬಾಪಾಂನಿ ಸರ್ವ್ ಫಿರ್ಗಜ್‌ಗಾರಾಂ ಸಂಗಿ ಖುರ್ಸಾವಾಟ್ ಚಲೊವ್ನ್ ವೆಲಿ. ಉಪ್ರಾಂತ್ ದೇವ್ ಸ್ತುತೆಚೊ ಪಯ್ಲೊ ಭಾಗ್ ಜಾವ್ನ್ ದೆವಾಚ್ಯಾ ಸಭ್ದಾಚೊ ಸಂಭ್ರಮ್ ಚಲವ್ನ್ ವೆಲೊ. ದೆವಾಚೆ ಉತರ್ ಪರ್ಗಟುನ್ ಜೆಜುಚ್ಯಾ ಕಷ್ಟಾ ಮರ್ಣಾಚೊ ಪಾಶಾಂವ್ ನಿಯಾಳ್ ಕೆಲೊ. ಪ್ರಧಾನ್ ಯಾಜಕ್ ಜಾವ್ನ್ ಬೆಂಗ್ಳೂರ್ ಸಾಂ. ಪೀಟರ್ ಸೆಮಿನಾರಿಚೆ ಆರ್ಥಿಕ್ ಆಡಳ್ತೆದಾರ್ ಮಾ। ಸುನಿಲ್ ಡಿಸೋಜ ಬಾಪಾಂನಿ ಸೊಮ್ಯಾಚೆಂ ಖುರ್ಸಾ ಮರಣ್, ಜಾಂವ್ ಆಮ್ಚ್ಯಾ ಭಾವಾರ್ಥಿ ಜಿವಿತಾಚೆಂ ಧೋರಣ್ ಮ್ಹಳ್ಳ್ಯಾ ಸಂದೇಶಾಖಾಲ್ ಪ್ರಸಂಗ್ ದೀಂವ್ನ್ ಜೆಜುನ್ ಸೊಡ್ವಣ್ ಕರ್ತಾಸ್ತಾನಾ ಸಾಂಗ್'ಲ್ಲ್ಯಾ ಸಾತ್ ಉತ್ರಾಂ ವಯ್ರ್ ನಿಯಾಳ್ ಕೆಲೊ. ದೇವ್ ಸ್ತುತೆಚೊ ದುಸ್ರೊ ಭಾಗ್ ಜಾವ್ನ್ ವೆವೆಗ್ಳ್ಯಾ ಗರ್ಜೆ ಪಾಸತ್ ಸಂಭ್ರಮಿಕ್ ಪ್ರಾರ್ಥನಾಂ ಭೆಟಯ್ಲಿಂ.ದೇವ್ ಸ್ತುತೆಚೊ ತಿಸ್ರೊ ಭಾಗ್ ಜಾವ್ನ್ ಪವಿತ್ರ್ ಖುರ್ಸಾಚೆಂ ಭಜನ್ ಆನಿ ನಮಾನ್ ಚಲವ್ನ್ ವ್ಹೆಲೆಂ. ಆಯ್ಚ್ಯಾ ದೇವ್ ಸ್ತುತೆಚೆಂ ಕೇಂದ್ರ್ ಜಾವ್ನಾಸಾ ಖುರಿಸ್. ತ್ಯಾ ಖುರ್ಸಾರ್ ಉಮ್ಕಾಳ್ಳೊ ಸೊಮಿ ಜೆಜು. ನಾಲೀಸಾಯೆಚ್ಯಾ ಆನಿ ಆಕ್ಮಾನಾಚ್ಯಾ ಖುರ್ಸಾರ್ ತೊ ಮೆಲೊ ಆನಿ ಪುನರ್ ಜಿವಂತ್ ಜಾವ್ನ್ ತೊ ಖುರಿಸ್ ಜಯ್ತಾಚೊ ಆನಿ ಮಾನಾಚೊ ಕೆಲೊ. ಹ್ಯಾ ಖುರ್ಸಾ ಥಾವ್ನ್ ಆಮ್ಕಾಂ ಬಚಾವಿ ಲಾಬ್ಲಿ ಆನಿ ಹ್ಯಾ ಖುರ್ಸಾಕ್ ಪರ್ಗಟ್ ಮಾನ್ ಕರ್ನ್ ಭಜನ್ ಕೆಲೆಂ. ಉಪ್ರಾಂತ್ ಸರ್ವ್ ಲೋಕಾಂನಿ ಖುರ್ಸಾಚೊ ಉಮೊ ಘೆಂವ್ನ್ ಖುರ್ಸಾಕ್ ಮಾನ್ ಕೆಲೊ. ದೇವ್ ಸ್ತುತೆಚೊ ಚವ್ತೊ ಭಾಗ್ ಕ್ರೀಸ್ತ್ ಪ್ರಸಾದ್, ಸಗ್ಳಾ ವರ್ಸಾಂತ್ ಅಖ್ಯೆ ಪವಿತ್ರ್ ಸಭೆಂತ್ ಆಜ್ ಮಾತ್ರ್ ಮಿಸಾಚೆ ಬಲಿದಾನ್ ನಾಂ ತರಿ ಪವಿತ್ರ್ ಸಭಾ ತಿಚ್ಯಾ ಸಾಂದ್ಯಾಂನಿ ಜೆಜು ಕ್ರಿಸ್ತಾಚ್ಯಾ ದೈವಿಕ್ ಉತ್ರಾನ್ ಆನಿ ಕುಡಿ ರಗ್ತಾನ್ ಫೋಷಿತ್ ಜಾಂವ್ಕ್ ಜಾಯ್ ಮ್ಹಣ್ ಆಶೆತಾ ಜಾಲ್ಲ್ಯಾನ್ ದೆವಾಚಾ ಉತ್ರಾನ್ ಫೋಷಿತ್ ಜಾಲ್ಲ್ಯಾ ಸರ್ವಾಂನಿ ಜೆಜುಚಿ ಕೂಡ್ ಆನಿ ರಗತ್ ಸೆಂವ್ಕ್ ಆನಿ ಎವ್ಕರಿಸ್ತಾಂತ್ಲ್ಯಾ ಜೆಜು ಥಂಯ್ ಭಾವಾರ್ಥ್ ಘಟ್ ಕರುಂಕ್ ಕ್ರೀಸ್ತ್ ಪ್ರಸಾದ್ ರೀತಿಂತ್ ವಾಂಟೊ ಘೆವ್ನ್ ಕ್ರೀಸ್ತ್ ಪ್ರಸಾದ್ ಸೆವ್ಲೊ. ದೇವ್ ಸ್ತುತೆಂತ್ ಲೋಕಾ ಸಂಗಿ ಮಾ।ಬಾ।ದೊ।ಪಿಯುಸ್ ಪೆಡಲಿಸ್‌ ಪಿಂಟೊ, ದಿಯಾಕೊನ್ ವಿಕಾಸ್ ಪಿರೇರಾ ಹಾಜರ್ ಆಸ್'ಲ್ಲೆ. ಶೋನ್ ಫೆರ್ನಾಂಡಿಸಾನ್ ತಸ್ವೀರ್ ಕಾಡ್ನ್ ಸಹಕಾರ್ ದಿಲೊ.