ಅಲ್ಲೆಲೂಯಾಚೊ ಸನ್ವಾರ್ (ಪಾಸ್ಕಾಂಚಿ ಜಾಗ್ರಣ್)

ಕ್ರೀಸ್ತಿ ಭಾವಾರ್ಥಾಚಿ ಬುನ್ಯಾದ್ ಜಾವ್ನಾಸ್ಚೆಂ ಜೆಜುಚೆಂ ಪುನರ್ ಜಿವಂತ್ಪಣ್ ಪರ್ಗಟ್ಚೊಂ ಅಲ್ಲೆಲೂಯಾಚೊ ಸನ್ವಾರ್ (ಪಾಸ್ಕಾಂಚಿ ಜಾಗ್ರಣ್) ವ್ಹಡಾ ಸಂಭ್ರಮಾನ್ ಆನಿ ದಬಾಜೆನ್ ಆಚರ್ಸಿಲೊ. ಸಾಂಜೆರ್ 7:00 ವ್ಹರಾರ್ ಉಗ್ತ್ಯಾ ಮೈದಾನಾರ್ ಉಜ್ವಾಡಾಚಿ ರೀತ್ ಚಲವ್ನ್ ವರ್ನ್ ದೇವ್ ಸ್ತುತಿ ಆರಂಭ್ ಕೆಲಿ. ಫಿರ್ಗಜ್ ವಿಗಾರ್ ಭೊ। ಮಾ। ರುಡೊಲ್ಫ್ ರವಿ ಡೆಸಾ ಬಾಪಾಂನಿ ಜಳ್ತೊ ಉಜೊ ಆಶೀರ್ವಾದಿತ್ ಕರ್ನ್ ಜೆಜುಚ್ಯಾ ಜಿವಂತ್ಪಣಾಚೊ ಆನಿ ಉಜ್ವಾಡಾಚೊ ಸಂಕೇತ್ ಜಾವ್ನಾಸ್ಚ್ಯಾ ಪಾಸ್ಕಾಂಚಾ ವಾತಿಚೆರ್ ಆಸ್ಚೆ ಅಂಕ್ಡೆ ಆನಿ ಘುರ್ತ್ ವಿವರುನ್ ಧುಂಪಾಚೆ ಖಿಳೆ ತೊಪುನ್ ಆಶೀರ್ವಾದಿತ್ ಕೆಲ್ಲ್ಯಾ ನವ್ಯಾ ಉಜ್ಯಾ ಥಾವ್ನ್ ಪಾಸ್ಕಾಂಚಿ ವಾತ್ ಪೆಟಯ್ಲಿ. ಪಾಸ್ಕಾಂಚಿ ವಾತ್ ಆನಿ ಲೋಕಾಂನಿ ಜಳ್ತ್ಯೊ ವಾತಿ ಘೆಂವ್ನ್ ಕಾಳೊಕ್ ಆಸ್’ಲ್ಲ್ಯಾ ದೇವ್ ತೆಂಪ್ಲಾಂಕ್ ಭಿತರ್ ಸರ್ನ್ ಉಜ್ವಾಡ್ ಫಾಂಕೊಂವ್ಣ್ ಪಾಸ್ಕಾಚಾ ವಾತಿಚೆಂ ಸ್ತುತಿಗಾಯನ್ ಕೆಲೆಂ. ಉಪ್ರಾಂತ್ ಸಾಲ್ವಾಸಾಂವಾಚಿ ಆನಿ ಆಮ್ಚ್ಯಾ ಬಚಾವೆಚಿ ಚರಿತ್ರಾ ಆಟಾಪ್ಚಿಂ ಪರ್ನ್ಯಾ ಆನಿ ನವ್ಯಾ ಸೊಲ್ಲ್ಯಾಂತ್ಲಿಂ ವಾಚ್ಪಾಂ ಪರ್ಗಟ್ ಕರ್ನ್ ದೆವಾಚ್ಯಾ ಸಬ್ದಾಚಿ ರೀತ್ ಚಲವ್ನ್ ವೆಲಿ. ಪ್ರಧಾನ್ ಯಾಜಕ್ ಜಾವ್ನ್ ಸಂಭ್ರಮಿಕ್ ಮಿಸಾಚೆ ಬಲಿದಾನ್ ಭೆಟಯಿಲ್ಲ್ಯಾ ಬೆಂಗ್ಳೂರ್ ಸಾಂ. ಪೀಟರ್ ಸೆಮಿನಾರಿಚೆ ಆರ್ಥಿಕ್ ಆಡಳ್ತೆದಾರ್ ಮಾ। ಸುನಿಲ್ ಡಿಸೋಜ ಬಾಪಾಂನಿ ಆಮಿ ಜಾವ್ನಾಸಾಂವ್ ಪಾಸ್ಕಾಂಚಿ ಪರ್ಜಾ ಆಲ್ಲೆಲೂಯಾ ಜಾವ್ನಾಸಾ ಆಮ್ಚ್ಯಾ ಜಯ್ತಾಚೆಂ ಗೀತ್ ಮ್ಹಳ್ಳ್ಯಾ ಸಾಂ. ಅಗಸ್ತಿನಾಚ್ಯಾ ಉತ್ರಾಂ ವಯ್ರ್ ನಿಯಾಳ್ ಕರ್ನ್ ಅರ್ಥಾಭರಿತ್ ಪ್ರಸಂಗ್ ದೀವ್ನ್ ತಾಚ್ಚ್ ಬರಿ ಜಾವ್ಚ್ಯಾಂಕ್ ಉಲೊ ದಿಲೊ. ಉಪ್ರಾಂತ್ ಪ್ರಧಾನ್ ಯಾಜಕಾಂನಿ ಪ್ರಾರ್ಥನ್ ಕರ್ನ್ ಉದ್ಕಾಚೆರ್ ಆಶೀರ್ವಾದ್ ಘಾಲೊ ಹ್ಯಾ ಸಂಧರ್ಬಿಂ ಜಳ್ತೊ ವಾತಿ ಘೆಂವ್ನ್ ಆಮ್ಚ್ಯಾ ಪವಿತ್ರ್ ಸ್ನಾನಾಚೊ ಅಂಗಂವ್ಣೊ ನವ್ಯಾನ್ ಕರ್ನ್ ತ್ರಿಎಕ್ ದೆವಾ ಥಂಯ್ ಆಮ್ಕಾಂ ಆಸ್ಚೊ ಭಾವಾರ್ಥ್ ಭಕ್ತಿನ್ ಉಚಾರ್ಲೊ. ಆಶೀರ್ವಾದಿತ್ ಕೆಲ್ಲೆಂ ನವೆಂ ಉದಾಕ್ (ಅಂಗ್ಮೆಂತ್) ಶೆಣಾಂವ್ನ್ ಸರ್ವಾಂಕ್ ಪವಿತ್ರ್ ಕೆಲೆಂ. ದೇವ್ ಸ್ತುತೆಂತ್ ಫಿರ್ಗಜ್ ವಿಗಾರ್ ಮಾ। ಬಾ। ದೊ. ಪಿಯುಸ್ ಫಿಡೆಲಿಸ್ ಪಿಂಟೊ, ದಿಯಾಕೊನ್ ವಿಕಾಸ್ ಪಿರೇರಾ ಹಾಜರ್ ಆಸ್’ಲ್ಲೆ. ಗಾಯನ್ ಪಂಗ್ಡಾಚ್ಯಾ ಸುಮಧುರ್ ಗಾಯನಾನ್ ಫೆಸ್ತಾಚೊ ಸಂಭ್ರಮ್ ದೊಡ್ತೊ ಕೆಲೊ. ಪಾಸ್ಕಾಂಚೊ ಸಂಭ್ರಮ್ ದಬಾಜೆನ್ ಸಂಭ್ರಮುಕ್ ಸಹಕಾರ್ ದಿಲ್ಲ್ಯಾ ಸರ್ವಾಂಚೊ ವಿಗಾರ್ ಬಾಪಾಂನಿ ಉಪ್ಕಾರ್ ಬಾವುಡ್ಲೊ. ಮುಡ್ದೊಮ್-ಗಾರಾಂಕ್ ವಾತಿ ದೀವ್ನ್ ಮಾನ್ ಕೆಲೊ. ಹ್ಯಾಚ್ ವೆಳಾರ್ ಪೊಂಪೈಚೆಂ ಫಾಲ್ಕೆಂ ಪಾಸ್ಕಾಂಚೊ ಅಂಕೊ ದಿಯಾಕೊನ್ ವಿಕಾಸ್ ಪಿರೇರಾ ಬಾಪಾನಿ ಮೊಕ್ಳಿಕ್ ಕೆಲೊ. ಶ್ರೀಮತಿ ಡೆಲ್ಸಿ ರೊಡ್ರಿಗಸ್ ಹಿಣೆಂ ಮೊಕ್ಳಿಕ್ ಕಾರ್ಯೆಂ ಚಲವ್ನ್ ವೆಲೆಂ. ಪಾಟ್ಲ್ಯಾ ಸ(6) ಮಹಿನ್ಯಾ ಥಾವ್ನ್ ಆಮ್ಚ್ಯಾ ಫಿರ್ಗಜೆಕ್ ತರ್ಭೆತಿ ಆನಿ ಮಿಸಾಂವ್ ವಾವ್ರಾಕ್ ಯೇವ್ನ್ ವಿಗಾರಾ ಸಂಗಿ ಸೆವಾ ದೀವ್ನ್ ಆಮ್ಚ್ಯಾ ಫಿರ್ಗಜೆ ಥಾವ್ನ್ ನಿರ್ಗಮನ್ ಜಾಂವ್ಚ್ಯಾ ಸಂಧರ್ಬಿಂ ದಿಯಾಕೊನ್ ವಿಕಾಸ್ ಪಿರೇರಾ ಬಾಪಾಂಕ್ ಆಮ್ಚ್ಯಾ ಫಿರ್ಗಜೆಂತ್ ತಾಣಿ ದಿಲ್ಲ್ಯಾ ಸೆವೆಕ್ ಫಿರ್ಗಜ್ ವಿಗಾರ್, ಉಪಾಧ್ಯಕ್ಷ್, ಕಾರ್ಯದರ್ಶಿನ್ ಫುಲಾಂ ತುರೊ ದೀವ್ನ್ ಉಪ್ಕಾರ್ ಭಾವುಡ್ಲೊ ಆನಿ ಯಾಜಕೀ ದೀಕ್ಷಾ ಜೊಡುಂಕ್ ವೆಚ್ಯಾ ತಾಂಕಾ ಉಲ್ಲಾಸ್ ಪಾಟವ್ನ್ ಸರ್ವ್ ಬರೆಂ ಮಾಗ್ಲೆಂ. ಮಿಸಾ ಉಪ್ರಾಂತ್ ಹರ್ಯೇಕಾ ಕುಟ್ಮಾಂಕ್ ಆಶೀರ್ವಾದಿತ್ ಕೆಲ್ಲ್ಯಾ ನವ್ಯಾ ಉದ್ಕಾಚ್ಯೊ ಬಾಟ್ಲ್ಯೊ ವಾಂಟ್ಲ್ಯೊ. ತಶೆಂಚ್ ಹಾಜರ್ ಆಸ್'ಲ್ಲ್ಯಾ ಸರ್ವಾಂಕ್ ಕೇಕ್ ಆನಿ ಪೀವನ್ ವಾಂಟ್ಲೆಂ. ಶೋನ್ ಫೆರ್ನಾಂಡಿಸಾನ್ ತಸ್ವೀರ್ ಕಾಡ್ನ್ ಸಹಕಾರ್ ದಿಲೊ.