ಜಿಣಿಯೆಚ್ಯಾ ಭಾಂಗಾರೋತ್ಸವ್ ಆನಿ ಯಾಜಕೀ ದೀಕ್ಷೆಚ್ಯಾ 21ವ್ಯಾ ವರ್ಸಾಂಚೊ ಸಂಭ್ರಮ್

ಫಿರ್ಗಜ್ ವಿಗಾರ್ ಭೊ| ಮಾ| ರುಡೊಲ್ಪ್ ರವಿ ಡೆಸಾ ಹಾಂಚ್ಯಾ ಜಲ್ಮಾ ದಿಸಾಚೊ ಭಾಂಗ್ರಾಳೋತ್ಸವ್ ತಶೆಂಚ್ 21 ವ್ಯಾ ವರ್ಸಾಚೊ ಯಾಜಕೀ ದೀಕ್ಷೆಚೊ ದೀಸ್ ಗೊವ್ಳಿಕ್ ಪರಿಷದೆಚ್ಯಾ ಮುಖೇಲ್ಪಣಾಖಾಲ್, ಫಿರ್ಗಜ್ ಲೊಕಾಚಾ ಸಹಕಾರಾನ್ ಎಪ್ರಿಲಾಚಾ 21 ತಾರಿಕೆರ್ ಸಂಭ್ರಮ್ಲೊ. ಸಾಂಜೆರ್ 5 ವ್ಹರಾರ್ ಅಪ್ಣಾಕ್ ಭಲಾಯ್ಕೆಭರಿತ್ ಜಿಣ್ಯೆಚಿ 50 ವರ್ಸಾಂ ಆನಿ 21 ವರ್ಸಾಂಚಿ ಯಾಜಕೀ ಜಿಣಿ ಫಾವೊ ಕೆಲ್ಲ್ಯಾ ಧನ್ಯಾ ದೆವಾಕ್ ಅರ್ಗಾಂ ದೀಂವ್ನ್ ಆಪ್ಲ್ಯಾ ಮೊಗಾಚೆ ಮಿತ್ರ್ ಯಾಜಕ್, ಸಾಂಗಾತಿ ಯಾಜಕ್, ವಾರಾಡ್ಯಾಚೆ, ಫಾ. ಮುಲ್ಲರ್ಸ್ ಸಂಸ್ಥ್ಯಾಚೆಂ ಯಾಜಕ್, ಫಿರ್ಗಜೆಚೆ ಸರ್ವ್ ಯಾಜಕ್,ದಿಯಾಕೊನ್ ಬಾಪ್ ಹಾಂಚ್ಯಾ ಸಂಗಿ ಪವಿತ್ರ್ ಎವ್ಕರಿಸ್ತಾಚೆಂ ಬಲಿದಾನ್ ಭೆಟಯ್ಲೆಂ . ವಿಗಾರಾಚ್ಯಾ ಕುಟ್ಮಾಚ್ಯಾ ಸಾಂದ್ಯಾನಿ ಆನಿ ಫಿರ್ಗಜ್‌ಗಾರಾಂನಿ ಹ್ಯಾ ಬಲಿದಾನಾಂತ್ ವಾಂಟೊ ಘೆತ್ಲೊ.ಮಾ|ಡೆನಿಸ್ ಡೆಸಾ ಬಾಪಾಂನಿ ದೆವಾಚಾ ಉತ್ರಾಂ ವಯ್ರ್ ನಿಯಾಳ್ ದಿಲೊ. ವಿಗಾರ್ ಬಾಪಾಂಚ್ಯಾ ದೆಣ್ಯಾಂ ವಯ್ರ್ ಏಕ್ ಸುಕ್ಣ್ಯಾನದರ್ ಘಾಲಿ. ಸುಮಾರ್ 51 ಯಾಜಕ್ ಹಾಜರ್ ಆಸ್’ಲ್ಲೆ.

ಮಿಸಾಚಾ ಬಲಿದಾನಾ ಉಪ್ರಾಂತ್ ಥಂಡ್ ಪೀವನ್ ಸೆವ್ನ್ ಜಾತೆಚ್ ಇಗರ್ಜೆಚ್ಯಾ ಉಗ್ತ್ಯಾ ಮೈದಾನಾರ್ 6:45 ವ್ಹರಾರ್ ವೆದಿ ಕಾರ್ಯೆಂ ಆರಂಭ್ ಕೆಲೆಂ.ಕಾರ್ಯೆಂ ನಿರ್ವಾಹಕ್ ದಿಯಾಕೊನ್ ಬಾಪ್ ವಿಕಾಸ್ ಪಿರೇರಾನ್ ಪ್ರಸ್ತಾವಿಕ್ ಉತ್ರಾಂ ಸವೆಂ ಜಮ್ಲೆಲ್ಯಾ ಸರ್ವಾಂಕ್ ಬರೊ ಯೆವ್ಕಾರ್ ಮಾಗ್ತಾಚ್ ಪಿ.ವೈ.ಸಿ ಚ್ಯಾ ಸಾಂದ್ಯಾಂನಿ ಪ್ರಾರ್ಥನ್ ನೃತ್ಯದ್ವಾರಿ ಕಾರ್ಯಾಚೆರ್ ದೆವಾಚೊ ಆಧಾರ್ ಮಾಗ್ಲೊ. ವಿಗಾರ್ ಬಾಪಾಂನಿ ಆನಿ ಮಾನಾಚ್ಯಾ ಸಯ್ರೆ ಮಂಗ್ಳುರ್ ದಿಯೆಸೆಜಿಚೆ ವಿಗಾರ್ ಜೆರಾಲ್ ಮಾ| ಬಾ| ಮೊ| ಮ್ಯಾಕ್ಸಿಮ್ ನೊರೊನ್ಹಾ, ವಿಗಾರಾಚೊ ಭಾವ್ ಮಾ।ಬಾ।ರೊಕಿ ಡೆಸಾ, ಸಾಂಗಾತಿ/ಮಿತ್ರ್ ಯಾಜಕ್ ಮಾ।ಬಾ। ಫ್ರಾನ್ಸಿಸ್ ಕ್ರಾಸ್ತಾ, ವಾರಾಡೊ ಯಜಕಾಂಚೊ ಕಾರ್ಯದರ್ಶಿ ಮಾ।ಬಾ। ಫ್ರಾನ್ಸಿಸ್ ರೊಡ್ರಿಗಸ್, ಧರ್ಮ್ ಭಯ್ಣ್ ಜಯಾ, ಫಿ.ಗೊ.ಪ. ಉಪಾಧ್ಯಕ್ಷ್ ಶ್ರೀಮಾನ್ ರೊಮಾನ್ಸ್ ಲೋಬೊ, ಫಿ.ಗೊ.ಪ.ಕಾರ್ಯದರ್ಶಿ ಶ್ರೀಮಾನ್ ಜೊನ್ಸನ್ ಲೋಬೊ, ಆಯೋಗಾಂಚಿ ಸಂಯೋಜಕಿ ಶ್ರೀಮತಿ ಹಿಲ್ಡಾ ಮಿನೇಜಸ್ ಹಾಣಿಂ ಬಸ್ಕಾಂ ಸ್ವೀಕಾರ್ ಕರ್ನ್ ವೆದಿ ಸೊಭಯ್ತಾಚ್ ಫಿ.ಗೊ.ಪ.ಉಪಾಧ್ಯಕ್ಷ್ ಮಾನೆಸ್ತ್ ರೊಮಾನ್ಸ್ ಲೋಬೊನ್ ವೆದಿರ್ ಆಸ್ಲೆಲ್ಯಾ ಮಾನಾಚಾ ಸಯ್ರ್ಯಾಂಕ್ ಆನಿ ಕಾರ್ಯಾಕ್ ಆಯ್ಲೆಲ್ಯಾ ವಿಗಾರ್ ಬಾಪಾಚಾ ಕುಟ್ಮಾಚಾಂಕ್, ಸಾಂಗಾತ್ಯಾಕ್, ಮಿತ್ರಾಂಕ್ ಸರ್ವಾಂಕ್ ಫುಲಾಂ ತುರೊ ದೀವ್ನ್ ಸ್ವಾಗತ್ ಕೆಲೊ ಆನಿ ಕಾರ್ಯದರ್ಶಿ ಸವೆಂ ಸಂಪ್ರದಾಯಿಕ್ ರಿತಿನ್ ಪಾನ್ ಪೊಡ್ ಉದಾಕ್ ದೀವ್ನ್ ಕಾರ್ಯಾಕ್ ಆಯ್ಲೆಲ್ಯಾ ಸರ್ವಾಂಕ್ ಬರೊ ಯೆವ್ಕಾರ್ ಮಾಗ್ಲೊ. ಹ್ಯಾಚ್ಚ್ ವೆಳಾ ವಿಗಾರಾ ಸಂಗಿ ಯಾಜಕೀ ದೀಕ್ಷಾ ಜೊಡ್’ಲ್ಲ್ಯಾ ಸಾಂಗಾತಿ ಯಾಜಕಾಂಕ್ ವಿಗಾರ್ ಬಾಪಾಂನಿ ಫುಲಾಂ ತುರೊ ದೀಂವ್ನ್ ಉಲ್ಲಾಸ್ ಪಾಟಯ್ಲೆ.

ಉಪ್ರಾಂತ್ ವಿಗಾರ್ ಬಾಪಾಂನಿ ಭಾಂಗ್ರಾಳ್ಯಾ ಜಲ್ಮಾದಿಸಾಚಿ ಕೇಕ್ ಕಾತರ್ನ್ ಸರ್ವಾಂಕ್ ಕೇಕ್ ವಾಂಟ್ಲಿ. ವಿಗಾರ್ ಬಾಪಾಂನಿ ತಾಂಚ್ಯಾ ಸಂಭ್ರಮಾಕ್ ಆಯ್ಲೆಲ್ಯಾ 90 ವರ್ಸಾಂಚಾ ಪೊದೊರ್ನಿ ಸಾಂಗಾತಾ ಕೇಕಿಚಿ ಗೊಡ್ಸಣ್ ವಾಂಟುನ್ ಘೆತ್ಲಿ.

ಮಾ| ಫಾನ್ಸಿಸ್ ಕ್ರಾಸ್ತಾ ಬಾಪಾಂನಿ ಹಾಜರ್ ಆಸ್’ಲ್ಲ್ಯಾ ಸರ್ವಾಂಚಾ ತರ್ಫೆನ್ ವಿಗಾರ್ ಬಾಪಾಂಕ್ ಉಲ್ಲಾಸ್ ಪಾಟವ್ನ್ ತಾಂಚ್ಯಾ ವ್ಯಕ್ತಿತ್ವಾಚಿ ಮಟ್ವಾನ್ ಪರಿಚಯ್ ದಿಲಿ. ಬರೆಂ ಗೂಣ್, ಸಾಂಗಾತಾ ಕಶೆಂ ಚಲ್ತತ್ ಮ್ಹಣ್ ವ್ಹಡ್ವಿಕಾಯ್ ಉಚಾರ್ಲಿ. ಕುಟ್ಮಾ ವಿಷ್ಯಾಂತ್ ತಿಳ್ಸಿಲೆಂ. ದೊಗಿ ಕಶೆಂ ಇಷ್ಟ್ ಜಾಂವ್ಕ್ ಕಾರಣ್ ಜಾಲ್ಲೆಂ ಘಡಿತ್ ಆಮ್ಚೆ ಮುಖಾರ್ ದವರ್ಲೆಂ ಆನಿ ತಾಂಕಾ ಸರ್ವ್ ಬರೆಂ ಮಾಗ್ಲೆಂ. ಮಾನೆಸ್ತ್ ಚಾರ್ಲ್ಸ್ ಡಿಕುನ್ಹಾನ್ ಉತ್ರಾಂ ಆನಿ ತಾಳೊ ಬಸಯಿಲ್ಲೆಂ ಜುಬ್ಲೆವಾಚೆಂ ಗೀತ್ ಗಾಯನ್ ಮಂಡಳೆನ್ ಭೋವ್ ಅಪುರ್ಬಾಯೆನ್ ಗಾವ್ನ್ ಸರ್ವಾಂಚೆಂ ನಾಂವಿಂ ವಿಗಾರ್ ಬಾಪಾಂಕ್ ಉಲ್ಲಾಸಿಲೆಂ.

ವಿಗಾರ್ ಬಾಪಾಂಕ್ ವೆದಿರ್ ಆಸ್'ಲ್ಲ್ಯಾ ಮಾನಾಚಾ ಸಯ್ರ್ಯಾಂನಿಂ ಶಾಲ್ ಪಾಂಗ್ರುನ್, ಉರ್ಮಾಲ್ ದವರ್ನ್, ಫುಲಾಂ - ಫಳಾಂ, ಆನಿ ಯಾದಿಸ್ತಿಕಾ ದೀವ್ನ್ ಸನ್ಮಾನ್ ಕೆಲೊ. ವಿಗಾರಾಚ್ಯಾ ಕುಟ್ಮಾಚಾ ಸಾಂದ್ಯಾಂನಿ ಉಲ್ಲಾಸ್ ಪಾಟಯ್ಲೆ, ಪೊಂಪಯ್ ಆನಿ ರೋಸಾ ಮಿಸ್ತಿಕಾ ಕೊವೆಂತಾಚಾ ಧರ್ಮ್ ಭಯ್ಣಿನಿಂ, ಸ್ನೇಹ ಸದನ ಆನಿ ಜೀವದಾನ ಸಂಸ್ಥ್ಯಾಚಾ ವ್ಹಡಿಲಾಂನಿ, ವಾಡ್ಯಾಂಗಾರಾಂ ತರ್ಫೆನ್ 10 ವಾಡ್ಯಾಚಾ ಗುರ್ಕಾರಾಂನಿ ವಿಗಾರ್ ಬಾಪಾಂಕ್ ಉಲ್ಲಾಸ್ ಪಾಟಯ್ಲೆ .

ವಿಗಾರ್ ಜೆರಾಲ್ ಮೊ| ಮ್ಯಾಕ್ಸಿಮ್ ನೊರೊನ್ಹಾ ಬಾಪಾಂನಿ ವಿಗಾರ್ ಬಾಪಾಂಕ್ ಶುಭಾಶಯ್ ಪಾಟವ್ನ್ ಫಾದರ್ ಮುಲ್ಲರ್ಸ್ ಸಂಸ್ಥ್ಯಾಚೆಂ ಆಡಳ್ತೆದಾರ್ ಜಾವ್ನ್ ತಾಣಿಂ ದಿಲ್ಲಿ ಸೆವಾ ವಾಖಣ್ಲಿಂ ಆನಿ ಆದರ್ಶ್,ಗುಣಾತ್ಮಕ್ ಚಿಂತ್ಪಾಚೊ ಸರ್ವಾಂಕ್ ಸಾಂಗಾತಾ ಕಾಣ್ಘೆವ್ನ್ ಚಲ್ಚೊ ಮ್ಹಣ್ ಹೊಗ್ಳಿಕ್ ಉಚಾರ್ಲಿ. ಗೊವ್ಳಿಕ್ ಪರಿಷದೆಚ್ಯಾ ಸರ್ವ್ ಅದ್ಲ್ಯಾ ಉಪಾಧ್ಯಕ್ಷ್, ಕಾರ್ಯದರ್ಶಿಂನಿ ಫುಲಾಂ ತುರೊ ದೀವ್ನ್ ಉಲ್ಲಾಸ್ ಪಾಟಯ್ಲೆ.

ಸರ್ವ್ ಸಂಘ್ ಸಂಸ್ಥ್ಯಾಚಾ ಅಧ್ಯಕ್ಷಾನಿಂ ಸಾಂಗಾತಾ ಯೇವ್ನ್ ಫುಲಾಂ ತುರೊ ದೀವ್ನ್ ವಿಗಾರ್ ಬಾಪಾಂಕ್ ಉಲ್ಲಾಸಿಲೆಂ. ವಾರಾಡ್ಯಾ ತರ್ಫೆನ್ ವಾರಾಡೊ ಗೊವ್ಳಿಕ್ ಪರಿಷದೆಚ್ಯಾ ಸಾಂದ್ಯಾನಿ ಉಲ್ಲಾಸ್ ಪಾಟಯ್ಲೆ

ವಿಗಾರ್ ಬಾಪಾಂನಿ ಅಪ್ಲಿಂ ಭೊಗ್ಣಾಂ ಉಚಾರ್ನ್ ಅಪ್ಣಾಕ್ ಜಲ್ಮಾದೀಸ್ ಆಚರ್ಸುಂಕ್ ಮನ್ ನಾತ್'ಲ್ಲೆಂ, ಉಪಾಧ್ಯಕ್ಷ್ ಆನಿ ಕಾರ್ಯದರ್ಶಿಚ್ಯಾ ಒತ್ತಾಯೆಕ್ ಲಾಗೊನ್ ಹೆಂ ಸಂಭ್ರಮ್ ಕಾರ್ಯೆಂ ಹಾಂಗಾಸರ್ ಜಾವ್ನ್ ಆಸಾ. ಸಂಭ್ರಮ್ ಕಾರ್ಯೆಂ ಆಸಾ ಕೆಲ್ಲ್ಯಾ ಉಪಾಧ್ಯಕ್ಷ್, ಕಾರ್ಯದರ್ಶಿ ತಶೆಂಚ್ ಗೊವ್ಳಿಕ್ ಪರಿಷದೆಚ್ಯಾ ಸಾಂದ್ಯಾಂಚೊ,ಫಿರ್ಗಜ್‌ಗಾರಾಂಚೊ ಉಪ್ಕಾರ್ ಭಾವುಡ್ಲೊ.ತಶೆಂಚ್ ಹ್ಯಾ ಸಂಭ್ರಮ್ ಕಾರ್ಯಾಕ್ ಆಯಿಲ್ಲ್ಯಾ ಸರ್ವಾಂಚೊ ಉಪ್ಕಾರ್ ಬಾವುಡ್ಲೊ.ಹ್ಯಾ ಸಂಭ್ರಮಾದ್ವಾರಿ ಫಿರ್ಗಜ್‌ಗಾರಾಂಕ್ ವಿಗಾರಾ ವಯ್ರ್ ಆಸ್ಚೊ ಮೋಗ್,ಅಭಿಮಾನ್ ಉಗ್ತ್ಯಾನ್ ದಿಸೊನ್ ಯೆತಾ ಮ್ಹಣ್ ಸಾಂಗೊನ್ ಹೊಗ್ಳಿಕ್ ಉಚಾರ್ಲಿ.

ಫಿ.ಗೊ.ಪ.ಕಾರ್ಯದರ್ಶಿ ಜೊನ್ಸನ್ ಲೋಬೊನ್ ಅರ್ಗಾಂ ಬಲಿದಾನಾಂತ್ ಸಹಭೆಟವ್ಣಿ ಕೆಲ್ಲ್ಯಾ ತಶೆಂಚ್ ಕಾರ್ಯಕ್ ಹಾಜರ್ ಜಾವ್ನ್ ಕಾರ್ಯಾಚಿ ಸೊಭಾಯ್ ಚಡಯ್ಲೆಲ್ಯಾ ಸರ್ವ್ ವಿಗಾರ್ ಬಾಪಾಂಚಾ ಮಿತ್ರ್ ಯಾಜಕಾಂಚೊ, ಕುಟ್ಮಾಚಾ ಸಾಂದ್ಯಾಂಚೊ, ವಿಗಾರ್ ಬಾಪಾಂಚಾ ಪೊದೊರ್ನಿಚೊ, ಕಾರ್ಯಾಕ್ ಆಯ್ಲೆಲ್ಯಾ ಸರ್ವ್ ವೊವ್ಳ್ಯಾಂಚೊ, ಉಲ್ಲಾಸಾಚೆಂ ಗೀತ್ ತಯಾರ್ ಕರ್ನ್ ತಾಳೊ ಬಸಯಿಲ್ಲ್ಯಾ ಮಾನೆಸ್ತ್ ಚಾರ್ಲ್ಸ್ ಡಿಕುನ್ಹಾಚೊ, ಕಾರ್ಯೆಂ ಯಶಸ್ವಿ ಜಾಂವ್ಕ್ ವಾವುರ್ಲೆಲ್ಯಾ ಗೊವ್ಳಿಕ್ ಪರಿಷದ್ ಸಾಂದ್ಯಾಂಚೊ , ಹರ್ಯೆಕಾ ರೀತಿನ್ ಕುಮೊಕ್ ಕೆಲ್ಲ್ಯಾ ಸರ್ವ್ ದಾನಿಂಚೊ ಫಿರ್ಗಜ್‌ಗಾರಾಂಚೊ ಉಪ್ಕಾರ್ ಭಾವುಡ್ಲೊ.

ದಿಯಾಕೊನ್ ಬಾಪ್ ವಿಕಾಸ್ ಪಿರೇರಾನ್ ಭೋವ್ ಅಪುರ್ಬಾಯೆನ್ ಕಾರ್ಯೆಂ ನಿರ್ವಹಣ್ ಕೆಲೆಂ. ಉಪ್ರಾಂತ್ ಸಂಭ್ರಮಾಚೆ ರುಚಿಕ್ ಜೆವಾಣ್ ಆನಿ ಐಸ್ ಕ್ರೀಂ ಸರ್ವಾಂನಿ ಸೆವ್ಲೆಂ. ಜೆವ್ಣಾ ಉಪ್ರಾಂತ್ ಸರ್ವ್ ಸಂಘ್ ಸಂಸ್ಥ್ಯಾಂಚ್ಯಾ ಸಾಂದ್ಯಾನಿ , ಗೊವ್ಳಿಕ್ ಪರಿಷದೆಚ್ಯಾ ಸಾಂದ್ಯಾಂನಿ ವಿಗಾರ್ ಬಾಪಾಂಕ್ ಉಲ್ಲಾಸುನ್ ಜಮೊ ತಸ್ವೀರ್ ಕಾಡ್ಲಿ, ತ್ಯಾ ನಂತರ್ ಸರ್ವ್ ಫಿರ್ಗಜ್‌ಗಾರಾಂನಿ ವಿಗಾರ್ ಬಾಪಾಂಕ್ ಉಲ್ಲಾಸ್ ಪಾಟಯ್ಲೆಂ. ಹೆಂ ಕಾರ್ಯೆಂ ಗುರ್ಕಾರ್ ಶ್ರೀ ಪ್ರವೀಣ್ ಲೋಬೊನ್ ಚಲವ್ನ್ ವೆಲೆಂ. ಸುಮಾರ್ ಎಕ್ ಹಜಾರ್ ಲೊಕಾಂನಿ ಹ್ಯಾ ಸಂಭ್ರಮಾಂತ್ ವಾಂಟೊ ಘೆತ್ಲೊ .ಶ್ರೀ ರವಿ ಕ್ರಾಸ್ತಾನ್ ತಸ್ವೀರ್ ಕಾಡ್ನ್ ಸಹಕರ್ಸಿಲೆಂ.

ಕಾರ್ಯಾಚ್ಯೋ ತಸ್ವಿರೊ ಸಕೈಲ್ ದಿಲ್ಲ್ಯಾ ಲಿಂಕಾಚೆರ್ ಪಳೊಂವ್ಕ್ ಮೆಳ್ತಾಲ್ಯೊ.
ಕಾರ್ಯಾಚ್ಯಾ ತಸ್ವೀರಾಂಚೊ ಆಲ್ಬಮ್