ಕ್ರಿಸ್ತಿ ಶಿಕ್ಷಣ್ ದಿವಸ್ - ಜುಬ್ಲೆವ್ 2025

ಫೆಬ್ರೆರ್ ಮಹಿನ್ಯಾಚಾ 23 ತಾರಿಕೆರ್ ಸಕಾಳಿಂ 7.30 ವೊರಾರ್ ಸಂಭ್ರಮಿಕ್ ಅರ್ಗಾಂ ಮಿಸಾ ಸವೆಂ ಕ್ರಿಸ್ತಿ ಶಿಕ್ಷಣಾಚೊ ಸಮಾಪ್ತ್ ದಿವಸ್ ಆಚರಣ್ ಕೆಲೊ. ಮಾ| ಬಾ| ಆ್ಯಂಟೋನಿ ಕ್ಲಾನಿ ಡಿಸೋಜ, ಗ್ಲ್ಯಾಡ್ಸನ್ ಹೋಮ್ ಹಾಚೊ ದಿರೆಕ್ತೊರ್, ಹಾಣಿಂ ಪ್ರಧಾನ್ ಯಾಜಕ್ ಜಾವ್ನ್ ಸಂಭ್ರಮಿಕ್ ಮಿಸಾಚೆಂ ಬಲಿದಾನ್ ಭೆಟಯ್ಲೆಂ ಆನಿ ದೆವಾಚ್ಯಾ ಉತ್ರಾಚೆರ್ ಭೋವ್ ಅಪುರ್ಬಾಯೆಚೊ ಪ್ರಸಂಗ್ ದಿಲೊ. ಭೊ|ಮಾ|ಬಾ| ರುಡೊಲ್ಫ್ ರವಿ ಡೆಸಾ, ಮಾ| ಬಾ|ದೊ| ಪಿಯುಸ್ ಫಿದೆಲಿಸ್ ಪಿಂಟೊ, ಮಾ|ಬಾ|ದೊ| ರಿಚಾರ್ಡ್ ಡಿಸೋಜಾ, ಮಾ|ಬಾ|ದೊ| ರೋಹನ್ ಮಿರಾಂದಾ, ದಿಯಾಕೊನ್ ಬಾಪ್ ವಿಕಾಸ್ ಪಿರೇರಾ ಹಾಣಿಂ ಸಾಂಗಾತ್ ದಿಲೊ. ಭ| ಅನಿತಾ ಟ್ರೆಸ್ಸಿ ಆನಿ ಶ್ರೀಮತಿ ಪ್ರವೀಣಾ ಡಿಸಿಲ್ವಾ ಹಾಂಚ್ಯಾ ಅಭ್ಯಾಸ ಮಾರಿಫಾತ್ ದೊತೊರ್ನಿಚ್ಯಾ ಭುರ್ಗ್ಯಾಂನಿ ಭೋವ್ ಅರ್ಥಾಭರಿತ್ ರಿತಿನ್ ಲಿತುರ್ಜಿ ಚಲವ್ನ್ ವ್ಹೆಲಿ. ಉಪ್ರಾಂತ್ ಕಾಫಿ-ಫಳ್ಹಾರ್ ಘೆವ್ನ್ 9.30 ವೊರಾರ್ ಪೊಂಪೈ ಸಭಾ-ಭವನಾಂತ್ ವೆದಿ ಕಾರ್ಯಾಕ್ ಸರ್ವಾಂ ಹಾಜರ್ ಜಾಲಿಂ.

ಸಾತ್ವ್ಯಾ ಕ್ಲಾಸಿಚ್ಯಾ ಭುರ್ಗ್ಯಾಂನಿ ಪ್ರಾರ್ಥನ್ ನೃತ್ಯ ಸವೆಂ ದೆವಾಚಿ ಆಶೀರ್ವಾದಾಂ ಮಾಗೊನ್ ಕಾರ್ಯ್ಯಾಕ್ ಚಾಲನ್ ದಿಲೆಂ. ಕಾರ್ಯಾಚೆಂ ಅಧ್ಯಕ್ಷ್ ಸ್ಥಾನ್ ಫಿರ್ಗಜ್ ವಿಗಾರ್ ತಶೆಂಚ್ ದಿರೆಕ್ತೊರ್, ಪೆಜಾರ್ ವಾರಾಡೊ ವಿಗಾರ್'ವಾರ್ ಭೊ|ಮಾ|ಬಾ| ರುಡೊಲ್ಫ್ ರವಿ ಡೆಸಾ, ಹಾಣಿಂ ಸೊಭಯ್ಲೆಂ. ಮುಖೆಲ್ ಸಯ್ರೊಂ ಜಾವ್ನ್ ಬಾಪ್ ಆ್ಯಂಟೋನಿ ಕ್ಲಾನಿ ಡಿಸೋಜ, ಫಿರ್ಗಜ್ ಗೊವ್ಳಿಕ್ ಪರಿಷಧ್ ಹಾಚೊ ಉಪಾಧ್ಯಕ್ಷ್ ಮಾನೆಸ್ತ್ ರೋಮನ್ಸ್ ಲೋಬೊ, ಕಾರ್ಯದರ್ಶಿ ಮಾನೆಸ್ತ್ ಜೊನ್ಸನ್ ಲೋಬೊ, 21 ಆಯೋಗಾಂಚಿ ಸಂಯೋಜಕಿ ಶ್ರೀಮತಿ ಹಿಲ್ಡಾ ಮಿನೇಜಸ್, ರೋಸಾ ಮಿಸ್ತಿಕಾ ಕಾಲೇಜಿಚಿ ಪ್ರಾಂಶುಪಾಲ್ ಆನಿ ವೈ.ಸಿ.ಯಸ್ ಸಚೇತಕಿ ಭ​| ಸಾಧನಾ, ಕ್ರಿಸ್ತಿ ಶಿಕ್ಷಣಾಚಿ ಸಂಯೋಜಕಿ ಶ್ರೀಮತಿ ಜೆಸಿಂತಾ ಪೇರಿಸ್ ವೆದಿಚೆರ್ ಉಪಸ್ಥಿತ್ ಆಸ್‌ಲ್ಲಿಂ. ವೆದಿಚೆರ್ ಉಪಸ್ಥಿತ್ ಆಸ್ಲ್ಯಾ ಮಾನಾಂಚಾ ಸಯ್ರ್ಯಾಂಕ್ ಆನಿ ಜಮ್ಲೆಲ್ಯಾಕ್ ಸರ್ವ್ ವೀಕ್ಷಕಾಂಕ್ ಶಿಕ್ಷಕಿ ಶ್ರೀಮತಿ ಡೆಲ್ಸಿ ರೊಡ್ರಿಗಸ್ ಹಾಣಿಂ ಸ್ವಾಗತ್ ಮಾಗ್ಲೊ. ವಿವಿಧ್ ತಾಲೆಂತ್ ಆನಿ ದೆಣ್ಯಾಂನಿ ಭರ್ಲೆಲ್ಯಾ ಭುರ್ಗ್ಯಾಂನಿ ನ್ರತ್ಯ್, ನಾಟ್ಕುಳೊ, ಒಪಾರಿ ಮುಕಾಂತ್ರ್ ಜಮ್ಲೆಲ್ಲ್ಯಾ ಸರ್ವ್ ವೀಕ್ಷಕಾಂಕ್ ಮನೋರಂಜನ್ ದಿಲೆಂ.

ಕ್ರಿಸ್ತಿ ಶಿಕ್ಷಣ್ ಆಯೋಗಾನ್ ಚಲಯ್ಲ್ಯಾ ಸಗ್ಳ್ಯಾ ವರ್ಸಾಚ್ಯಾ (2024-25) ಸರ್ವ್ ಕಾರ್ಯ್ಯಾಂಚಿ ಮಟ್ವಿ ಝಳಕ್ ವರ್ಧೆ ರುಪಾರ್ ಕ್ರಿಸ್ತಿ ಶಿಕ್ಷಣ್ ಸಂಯೋಜಕಿ ಶ್ರೀಮತಿ ಜೆಸಿಂತಾ ಪೇರಿಸ್ ಹಾಣಿಂ ಸಾಧರ್ ಕೆಲಿಂ. ಪಂಗಡ್ ಚಟುವಟಿಕೆನಿಂ, ಖಳನಾಸ್ತಾನಾ ದೊತೊರ್ನಿಕ್ ಹಾಜರ್ ಜಾಲ್ಲ್ಯಾಂಕ್, ಕ್ರೀಜ್ಮಾಚ್ಯಾ ಆನಿ ದೊತೊರ್ನಿಚ್ಯಾ ಪರಿಕ್ಷೇಂತ್ ಗರಿಷ್ಠ್ ಅಂಕ್ ಜೊಡ್ಲೆಲ್ಯಾಂಕ್ ಮಾನಾಚ್ಯಾ ಸಯ್ರಾಂನಿ ಬಹುಮಾನಾಂ ವಿತರಣ್ ಕೆಲಿಂ. ದಿಯಾಕಾನ್ ಬಾಪ್ ವಿಕಾಸ್ ಪಿರೇರಾನ್ ಬರವ್ನ್ ತಾಳೊ ಬಸೊವ್ನ್ ನಿರ್ದೆಶನ್ ಕೆಲ್ಲೊ ನಾಟ್ಕುಳೊ ಭರ್ವಶ್ಯಾಚಿ ಯಾತ್ರಿಕಾಂ ಆಮ್ಚ್ಯಾ ವೈ.ಸಿ.ಎಸ್ ಭುರ್ಗ್ಯಾಂನಿ ಪ್ರಸ್ತುತ್ ಕೆಲೊ. ಫಿರ್ಗಜ್ ವಿಗಾರ್ ಬಾಪಾಂನಿ ಸರ್ವ್ ಶಿಕ್ಷಕಾಂಚೊ ಆನಿ ಭುರ್ಗ್ಯಾಂಚ್ಯಾ ಆವಯ್-ಬಾಪಾಯ್ಚೊ ಉಪ್ಕಾರ್ ಭಾವುಡ್ಲೊಂ. ಆಪ್ಲ್ಯಾ ಭುರ್ಗ್ಯಾಂಕ್ ವೆಳಾರ್ ದೊತೊರ್ನಿಕ್ ಯೇಂವ್ಕ್ ಬರೆಂ ಮಾರ್ಗದರ್ಶನ್ ಆನಿ ಉತ್ತೇಜನ್ ದಿಲಾಂ ಮ್ಹುಣ್ ಹೊಗ್ಳಿಕ್ ಉಚಾರ್ನ್ ಅಭಿನಂದನ್ ಪಾಟಯ್ಲೆಂ. ತಶೆಂಚ್ ಆಪ್ಲ್ಯಾ ಸಂದೇಶಾಂತ್ ಕ್ರಿಸ್ತಿ ಶಿಕ್ಷಣಾನ್ ಕ್ರಿಯಾಳ್ ಜಾವ್ನ್ ಮಾಂಡುನ್ ಹಾಡ್‌ಲ್ಲಿಂ ಸರ್ವ್ ಚಟುವಟಿಕೊ ಊಂಚ್ಲ್ಯಾ ಮಟ್ಟಾರ್ ಆಸ್'ಲ್ಲಿಂ ಮ್ಹಣ್ ಹೊಗ್ಳಿಕ್ ಉಚಾರ್ನ್ ಪರತ್ ಶಾಭಾಸ್ಕಿ ಪಾಟೈಲ್ಲಿ ಆನಿ ಭುರ್ಗ್ಯಾಂನಿ ಫಿರ್ಗಜೆಂತ್ ಕ್ರಿಯಾಳ್ ಆಸ್‌ಲ್ಲ್ಯಾ ಪರಿಂ ವಾಡ್ಯಾಂನಿ ಕ್ರಿಯಾಳ್ ಆಸೊನ್ ವಾಡ್ಯಾ ಜಮಾತೆಕ್ ಹಾಜರ್ ಜಾಂವ್ಕ್ ಉಲೊ ದಿಲೊ. ನವ್ಯಾ ಕ್ಲಾಸಿಚಾ ಸೋನಾಲ್ ಫೆರ್ನಾಂಡಿಸಾನ್ ಅಪ್ಲಿಂ ಭೊಗ್ಣಾಂ ಉಚಾರ್ಲಿಂ. ವಿಗಾರ್ ಬಾಪಾನಿಂ ಸರ್ವ್ ಶಿಕ್ಷಕಾಂಕ್ ಉಗ್ಡಾಸಾಚಿ ಕಾಣಿಕ್ ದೀವ್ನ್ ಮಾನ್ ಕೆಲೊ. ಶಿಕ್ಷಕಿ ಭವ್ಯ ಡಿಸೋಜ ಹಾಣೆಂ ಸರ್ವಾಂಚೊ ಉಪ್ಕಾರ್ ಭಾವುಡ್ನ್ ಧ‌ನ್ಯವಾದ್ ಪಾಟೈಲೆಂ. ಸೊಮ್ಯಾಕ್ ಧಿನ್ವಾಸುಂಯಾ ಮ್ಹಳ್ಳ್ಯಾ ಗಿತಾಂ ಸವೆಂ ಸಾಂಸ್ಕೃತಿಕ್ ಕಾರ್ಯೆಂ ಸಂಪೈಲೆಂ. ಸಾಂಸ್ಕೃತಿಕ್ ಕಾರ್ಯೆಂ ಸರ್ವ್ ಶಿಕ್ಷಕಾಂಚಾ ಮಿನೆತಿನ್ ಆನಿ ಸಹಕಾರನ್ ಯಶಸ್ವಿ ಜಾಲೆಂ. ಪ್ರಿಯೋನಾ ರೊಡ್ರಿಗಸ್ ಹಾಣಿಂ ಭೋವ್ ಅಪುರ್ಬಾಯೆನ್ ಕಾರ್ಯೆಂ ನಿರ್ವಾಹಣ್ ಕೆಲೆಂ. ಸಗ್ಳ್ಯಾ ಕಾರ್ಯ್ಯಾಕ್ ಲಗ್ಬಗ್ 350 ಫಿರ್ಗಜ್‌ಗಾರಾಂ ಹಾಜರ್ ಆಸ್ಲಿಂ. ಹಾಜರ್ ಆಸ್ಲ್ಯಾ ಸರ್ವ್ ಫಿರ್ಗಜ್‌ಗಾರಾಂಕ್ ಆನಿ ಭುರ್ಗ್ಯಾಂಕ್ ಥಂಡ್ ಪೀವನ್, ಲಾಡು ಆನಿ ಐಸ್ ಕ್ರೀಮ್ ದೀವ್ನ್ ಧಾದೊಶಿ ಕೆಲೆಂ. ಪ್ರಮೀತ್ ಪಿಂಟೊ ಹಾಣಿಂ ಸರ್ವ್ ಕಾರ್ಯಕ್ರಮಾಚೊ ತಸ್ವಿರ್ಯೊ ಕಾಡ್ನ್ ಸಹಕರ್ಸಿಲೆಂ.