ಪಿ.ವೈ.ಸಿ - ಐ.ಸಿ.ವೈ.ಎಮ್ 52ವೊ ವಾರ್ಷಿಕೋತ್ಸವ್

ಫೆಬ್ರೆರ್ ಮಹಿನ್ಯಾಚಾ 09 ತಾರಿಕೆರ್ ಸಕಾಳಿಂ 7.30 ವೊರಾರ್ ಸಂಭ್ರಮಿಕ್ ಅರ್ಗಾಂ ಮೀಸಾ ಸವೆಂ ಪಿ.ವೈ.ಸಿ. ಐ.ಸಿ.ವೈ.ಎಮ್ ಹಾಚೊ ಬಾವೆ ಪನ್ನಾಸಾವೊ ವಾರ್ಷಿಕೋತ್ಸವ್ ಆರಂಭ್ ಕೆಲೊ. ಭೊ.ಮಾ.ಬಾ ರುಡೊಲ್ಫ್ ರವಿ ಡೆಸಾ ಬಾಪಾಂನಿ ಪ್ರಧಾನ್ ಯಾಜಕ್ ಜಾವ್ನ್ ಸಂಭ್ರಮಿಕ್ ಮಿಸಾಚೆಂ ಬಲಿದಾನ್ ಭೆಟಯ್ಲೆಂ ದಿಯೊಕಾನ್ ಬಾಪ್ ವಿಕಾಸ್ ಪಿರೇರಾ ಹಾಣಿಂ ದೆವಾಚ್ಯಾ ಉತ್ರಾಚೆರ್ ಭೋವ್ ಅಪುರ್ಬಾಯೆನ್ ಪ್ರಸಂಗ್ ದಿಲೊ. ಪಿ.ವೈ.ಸಿ - ಐ.ಸಿ.ವೈ.ಎಮ್ ಸಾಂದ್ಯಾನಿ ಭೋವ್ ಅರ್ಥಾಭರಿತ್ ರಿತಿನ್ ಲಿತುರ್ಜಿ ಚಲವ್ನ್ ವ್ಹೆಲಿ.

ಉಪ್ರಾಂತ್ ಸಾಂಜೆರ್ 6.00 ವೊರಾರ್ ಇರ್ಗಜೆಚಾ ಉಗ್ತ್ಯಾ ಮೈದಾನಾರ್ ವೆದಿ ಕಾರ್ಯ್ಯಾ ಸವೆಂ ವ್ಹಡಾ ದಬಾಜಾನ್ ಸಂಭ್ರಮ್ಲೊ. ಪಿ.ವೈ.ಸಿ - ಐ.ಸಿ.ವೈ.ಎಮ್ ಹಾಚ್ಯಾ ಸಾಂದ್ಯಾನಿ ಪ್ರಾರ್ಥನಾ ಗಿತಾ ಸವೆಂ ದೆವಾಚಿ ಆಶೀರ್ವಾದಾಂ ಮಾಗೊನ್ ಕಾರ್ಯ್ಯಾಕ್ ಚಾಲನ್ ದಿಲೆಂ. ಕಾರ್ಯಾಚೆ ಅಧ್ಯಕ್ಷ್ ಸ್ಥಾನ್ ಫಿರ್ಗಜ್ ವಿಗಾರ್ ತಶೆಂಚ್ ದಿರೆಕ್ತೊರ್, ಪೆಜಾರ್ ವಾರಾಡೊ ವಿಗಾರ್ ವಾರ್ ಭೊIಮಾI ಬಾI ರುಡೊಲ್ಫ್ ರವಿ ಡೆಸಾ ಹಾಣಿಂ ಸೊಭಯ್ಲೆಂ. ಮುಖೆಲ್ ಸಯ್ರೊ ಜಾವ್ನ್ ದಿಯಾಕೊನ್ ಬಾಪ್ ವಿಕಾಸ್ ಪಿರೇರಾ, ಮಾನಾಂಚೆ ಸಯ್ರೆ ಜಾವ್ನ್ ಪಿ.ವೈ.ಸಿ'ಚೊ ಗೌರವ್ ಸಾಂದೊ ಆನಿ ಸ್ಥಾಪಕ್ ಕಾರ್ಯದರ್ಶಿ ಮಾನೇಸ್ತ್ ಅರ್ಥರ್ ಮಿನೇಜಸ್, ಫಿರ್ಗಜ್ ಗೊವ್ಳಿಕ್ ಪರಿಷಧ್ ಹಾಚೆ ಉಪಾಧ್ಯಕ್ಷ್ ಮಾನೆಸ್ತ್ ರೋಮನ್ಸ್ ಲೋಬೊ, ಕಾರ್ಯದರ್ಶಿ ಮಾನೆಸ್ತ್ ಜೊನ್ಸನ್ ಲೋಬೊ, 21 ಆಯೋಗಾಂಚಿ ಸಂಯೋಜಕಿ ಶ್ರೀಮತಿ ಹಿಲ್ಡಾ ಮಿನೇಜಸ್, ಮಂಗ್ಳುರ್ ದಿಯೆಸೆಜ್ ಐ.ಸಿ.ವೈ.ಎಮ್ ಕೇಂದ್ರೀಯ್ ಸಮಿತಿ ಅಧ್ಯಕ್ಷ್ ಮಾನೆಸ್ತ್ ವಿನ್ಸಟನ್ ಸಿಕ್ವೇರಾ, ಪೆಜಾರ್ ವಾರಾಡೊ ಐ.ಸಿ.ವೈ.ಎಮ್ ಪ್ರತಿನಿಧಿ ಕುI ರಿಯಾನ್ನಾ ಡಿಕುನ್ಹಾ, ಮಂಗ್ಳುರ್ ದಿಯೆಸೆಜ್ ಐ.ಸಿ.ವೈ.ಎಮ್ ಕೇಂದ್ರೀಯ ಸಮಿತಿ ಖಜಾನ್ದಾರ್ ಕುIರೀನಾ ಕ್ರಾಸ್ತಾ, ಪೆಜಾರ್ ವಾರಾಡೊ ಐ.ಸಿ.ವೈ.ಎಮ್ ಅಧ್ಯಕ್ಷ್ ಕುIಜೊಸ್ವಿಟಾ ಡಿಸೋಜ, ಪಿ.ವೈ.ಸಿ. ಸಚೇತಕ್ ಮಾನೆಸ್ತ್ ಗೊಡ್ವಿನ್ ತಾವ್ರೊ, ಪಿ.ವೈ.ಸಿ ಅಧ್ಯಕ್ಷ್ ಲೆಸ್ಟರ್ ಮಿನೇಜಸ್ ಆನಿ ಕಾರ್ಯದರ್ಶಿ ಪ್ರೀಮಾ ಮಿನೇಜಸ್ ವೆದಿಚೆರ್ ಉಪಸ್ಥಿತ್ ಆಸ್‌ಲ್ಲಿಂ. ವೆದಿಚೆರ್ ಉಪಸ್ಥಿತ್ ಆಸ್ಲ್ಯಾ ಮಾನಾಂಚಾ ಸಯ್ರ್ಯಾಂಕ್ ಆನಿ ಜಮ್ಲೆಲ್ಯಾಕ್ ಸರ್ವ್ ವೀಕ್ಷಕಾಂಕ್ ಪಿ.ವೈ.ಸಿ ಅಧ್ಯಕ್ಷ್ ಲೆಸ್ಟರ್ ಮಿನೇಜಸ್ ಹಾಣೆಂ ಸ್ವಾಗತ್ ಮಾಗ್ಲೊ. ವಿವಿಧ್ ತಾಲೆಂತ್ ಆನಿ ದೆಣ್ಯಾಂನಿ ಭರ್ಲೆಲಿಂ ಯುವಜಣಾಂ ಆಪ್ಲಿ ದೆಣಿಂ ಲಿಪವ್ನ್ ದವರಿನಾಸ್ತಾಂ, ಫಿರ್ಗಜೆಂತ್ ತಶೆಂಚ್ ಸಮಾಜೆಂತ್, ಆಪ್ಲಿ ದೆಣಿಂ ಗಳ್ಸುನ್ ಸರ್ವಾಂಕ್ ಉಜ್ವಾಡ್ ಪಾಂಕೊನ್ ಉತ್ಸಾವ್ ಭರಿತ್ ಜಾಂವ್ದಿತ್ ಮ್ಹಣ್ ಆಶೆವ್ನ್ ಉಜೊ ಝಳಂವ್ಚ್ಯಾ ಮುಖಾಂತ್ರ್ ಬಾವೆ ಪನ್ನಾಸಾವೊ ವಾರ್ಷಿಕೋತ್ಸವ್ ಉದ್ಘಾಟನ್ ಮುಖೆಲ್ ಸಯ್ರೊ ದಿಯಾಕೊನ್ ಬಾಪ್ ವಿಕಾಸ್ ಪಿರೇರಾ ಹಾಣಿಂ ಚಲವ್ನ್ ವ್ಹೆಲೆಂ. ಆನಿ ಮಾನಾಂಚ್ಯಾ ಸಯ್ರ್ಯಾಂನಿ ಉದ್ಘಾಟನಾಕ್ ಸಾಂಗಾತ್ ದಿಲೊ‌. ಪಿ.ವೈ.ಸಿ.ನ್ ಚಲಯ್ಲ್ಯಾ ಸಗ್ಳ್ಯಾ ವರ್ಸಾಚ್ಯಾ ಸರ್ವ್ ಕಾರ್ಯ್ಯಾಚಿ ಮಟ್ವಿ ಝಳಕ್ ವರ್ಧೆ ರುಪಾರ್ ಕಾರ್ಯದರ್ಶಿ ಪ್ರೀಮಾ ಮಿನೇಜಸ್ ಹಾಣಿಂ ಸಾದರ್ ಕೆಲಿ. ಪಿ.ವೈ.ಸಿ ಸಾಂದೊ ಶೋನ್ ಫೆರ್ನಾಂಡಿಸ್ ಆನಿ ಅಗೋಸ್ತಿನ್ ಮಿನೇಜಸ್ ಹಾಣಿಂ ವರ್ಧೆಚೊ ವಿವರ್ ಪವರ್ ಪಾಯಿಂಟಾರ್ ಗಾಲ್ನ್ ಸಹಕರ್ಸಿಲೆಂ. ದಿಯಾಕೊನ್ ಬಾಪ್ ವಿಕಾಸ್ ಪಿರೇರಾ ಹಾಣಿಂ ಹೊ ವಾರ್ಷಿಕೋತ್ಸವ್ ಫಕತ್ ಪಿ.ವೈ‌.ಸಿ ಐ.ಸಿ.ವೈ.ಎಮ್ ‌ಸಂಘಟನಾಚೊ ನ್ಹಂಯ್ ಆಸ್ತಾಂ ಆಮಾ ಸರ್ವಾಂಚೊ, ಆವಯ್ ಬಾಪಾಯ್ನಿ ಆಪ್ಲ್ಯಾ ಭುರ್ಗ್ಯಾಂಕ್ ಹ್ಯಾ ಸಂಘಟನಾಕ್ ಭರ್ತಿ ಕರ್ನ್ ವರ್ತಿ ದೆಣ್ಗಿ ದಿಲ್ಯಾ ಮ್ಹಣ್ ಸಭಾರ್ ಬರ್ಯ್ಯಾ ಮನಾಚೆ‌ ವ್ಯಕ್ತಿ ಆನಿ ಆದ್ಲೆ‌‌ ಸಭಾರ್ ಗೌರವ್ ಸಾಂದ್ಯಾಂನಿ ಸಂಘಟನ್ ಅಭಿವೃದ್ಧೆಚ್ಯಾ ಪಾವ್ಲಾಂನಿ ಪುಡ್ ಕರುಂಕ್ ಫಾವೊ ಜಾಲಾ ಹೊ ವಾರ್ಷಿಕೋತ್ಸವ್ ಆಮಾ ಸರ್ವಾಂಚೊ ಮ್ಹಣ್ ಆದ್ಲ್ಯಾ ಆನಿ ಪ್ರಸ್ತುತ್ ಸಾಂದ್ಯಾಕ್ ಹೊಗ್ಳಿಕ್ ಉಚಾರ್ನ್ ಅಭಿನಂದನ್ ಪಾಠಯಿಲೆಂ. ಆನಿ ಪೊಂಪೈ ಯಂಗ್ ಸ್ಟರ್ಸ್ ಕ್ಲಬ್ ಮ್ಹಳ್ಳ್ಯಾ ಮಾತ್ರ್ ಆಸಾನಾಸ್ತಾಂ P ಅಕ್ಷರಾ ಪರ್ಮಾಣೆಂ Positive , Productive, Powerful, Prayerful, Patients, Progressive, Protective ಜಾವ್ನ್ Y ಮ್ಹಳ್ಯಾರ್ Young in thoughts and deeds, Youthful ಜಾಂವ್ಕ್ ಜಾಯ್, C ಅಕ್ಷರಾ ಪರ್ಮಾಣೆಂ Committed, Compassionate, Courageous ಆಸೆಂ ಜಾಲ್ಯಾರ್ ಮಾತ್ರ್ ಪಿ.ವೈ.ಸಿ ಸಂಘಟನ್ ಬಾಳ್ತಾಲೆಂ ಮ್ಹಳ್ಳ್ಳಿಂ ಕಾನಾ ಉತ್ರಾಂ ಸಾಂಗೊನ್, ಸಾದರ್ ಜಾಂವ್ಚ್ಯಾ ಬಿಂಡಿ ಸೊಲಾಂ ನಾಟಕಾಕ್ ಸರ್ವ್ ಬರೆಂ ಮಾಗ್ಲೆಂ.

ಪಿ.ವೈ.ಸಿ ಗೌರವ್ ಸಾಂದೊ ಆನಿ ಸ್ಥಾಪಕ್ ಕಾರ್ಯದರ್ಶಿ ಮಾನೆಸ್ತ್ ಅರ್ಥರ್ ಮಿನೇಜಸ್ ಹಾಣಿಂ ಪಿ.ವೈ‌.ಸಿ ಸಂಘಟನಾಂತ್ ದಿಲ್ಲಿ ಸೆವಾ ಮಾಂದುನ್ ಘೆವ್ನ್, ತಾಂಕಾ ಶಾಲ್ ಪಾಂಗ್ರುನ್, ಫುಲಾಂ ಫಳಾಂ ಆನಿ ಮಾನ್ ಪತ್ರ್ ಆನಿ ಯಾದಿಸ್ತಿಕಾ ದೀವ್ನ್ ವೆದಿಚೆರ್ ಉಪಸ್ಥಿತ್ ಆಸ್ಲ್ಯಾ ಮಾನಾಂಚಾ ಸಯ್ರ್ಯಾಂನಿ ಸನ್ಮಾನ್ ಕೆಲೆಂ. ಉಪ್ರಾಂತ್ ಸನ್ಮಾನಿತ್ ಜಾಲ್ಲ್ಯಾ ಮಾನೆಸ್ತ್ ಅರ್ಥರ್ ಮಿನೇಜಸ್ ಹಾಣಿಂ ಆಪ್ಲ್ಯಾ ಭೊಗ್ಣಾಂತ್ ಪಿ.ವೈ.ಸಿ ವಿಶ್ಯಾಂತ್ ಆದ್ಲ್ಯಾ ಜಾಯ್ತ್ಯಾ ಸಾಂದ್ಯಾಚ್ಯಾ ವಾವ್ರಾಚ್ಯಾ ಮಿನ್ಹತೆಚೊ ಫಳ್ ಜಾವ್ನ್ ಪಿ.ವೈ.ಸಿ ಝಡ್ ಆಸ್‌ಲ್ಲೆ ರೂಕ್ ಜಾವ್ನ್ ಪ್ರಸ್ತುತ್ ಸಾಂದೆ ಜಾಯ್ತೊ ಬರೊ ವಾವ್ರ್ ದೀವ್ನ್ ಆಸಾತ್ ಮ್ಹಣ್ ಶಾಭಾಸ್ಕಿ ಪಾಟವ್ನ್ ಪಿ.ವೈ.ಸಿ - ಐ.ಸಿ.ವೈ.ಎಮ್ ಸಾಂದ್ಯಾಕ್ ಉಲ್ಲಾಸ್ ಪಾಟವ್ನ್ ವಾರ್ಷಿಕೋತ್ಸವಾಕ್ ಸರ್ವ್ ಬರೆಂ ಮಾಗ್ಲೆಂ. ಮಾನ್ ಪತ್ರ್ ಪಿ.ವೈ.ಸಿ - ಐ.ಸಿ.ವೈ.ಎಮ್ ಲಿತುರ್ಜಿ ಕಾರ್ಯದರ್ಶಿ ವೆನಿಶಾ ಸಲ್ಡಾನ್ಹಾ ಹಾಣಿಂ ವಾಚುನ್ ಸಾಂಗ್ಲೆಂ.

ಉಪ್ರಾಂತ್ ಬಾವೆ ಪನ್ನಾಸಾವೊ ವಾರ್ಷಿಕೋತ್ಸವ್ ಆಚರಣ್ ಕರ್ಚ್ಯಾ ಸಂದರ್ಭಿ ಖೆಳವ್ನ್ ದಾಖಂವ್ಚ್ಯಾ 'ಬಿಂಡಿ ಸೊಲಾಂ' ನಾಟಕಾಚೆ ನಿರ್ದೇಶನ್ ಕೆಲ್ಲ್ಯಾ ವೆನಿಶಾ ಸಲ್ಡಾನಾ ಕಲಾಕುಲ್ ಹಾಂಕಾ ವಿಗಾರ್ ಬಾಪಾಂನಿ ಫುಲಾಂ ತುರೊ ಆನಿ ಯಾದಿಸ್ತಿಕಾ ದೀವ್ನ್ ಮಾನ್ ಕೆಲೆಂ. ಉಪ್ರಾಂತ್ ಮಂಗ್ಳುರ್ ಉತ್ತರ್ ಅಸೆಂಬ್ಲಿ ಎಲಿಸಾಂವಾಂತ್ ಇಂಡಿಯನ್ ಯೂತ್ ಕಾಂಗ್ರೆಸ್ ಹಾಚೊ ಉಪಾಧ್ಯಕ್ಷ್ ಜಾವ್ನ್ ವಿಂಚುನ್ ಆಯಿಲ್ಲ್ಯಾ ಪಿ.ವೈ.ಸಿ - ಐ.ಸಿ.ವೈ.ಎಮ್ ಸಾಂದೊ ಗ್ರೇಶನ್ ಡಿಸೋಜ ಹಾಂಕಾ ಫಿ.ಗೊ.ಪ. ಉಪಾಧ್ಯಕ್ಷನ್ ಫುಲಾಂ ತುರೊ ದೀವ್ನ್ ಮಾನ್ ಕೆಲೆಂ. ದಿರೆಕ್ತೊರ್ ಬಾಪಾಂನಿ ಆಪ್ಲ್ಯಾ ಸಂದೇಶಾಂತ್ ಪಿ.ವೈ.ಸಿ - ಐ.ಸಿ.ವೈ.ಎಮ್ ಸಾಂದೆ ಕ್ರಿಯಾಳ್ ಜಾವ್ನ್ ಮಾಂಡುನ್ ಹಾಡ್‌ಲ್ಲಿಂ ಸರ್ವ್ ಚಟುವಟಿಕೆ ಊಂಚಾಯ್ಚ್ಯ್ಯಾ ಮಟ್ಟಾರ್ ಜಾಲ್ಯಾಂತ್, ಆಜ್‌ಯಿ ವಾರ್ಷಿಕೋತ್ಸವ್ ಭೋವ್ ಅಪುರ್ಬಾಯೆನ್ ಕೀತೆಂಚ್ ಘುಸ್ಪೊಡ್ ನಾಸ್ತಾಂ ಊಂಚ್ಲ್ಯಾ ಮಟ್ಟಾರ್ ಮಾಂಡುನ್ ಹಾಡ್ಲಾಂ ಮ್ಹಣ್ ಸರ್ವ್ ಯುವಜಣಾಂಕ್ ಹೊಗ್ಳಿಕ್ ಉಚಾರ್ನ್ ಅಭಿನಂದನ್ ಪಾಠಯಿಲೆಂ ಆನಿ ಯುವಜಣಾಂ ಫಿರ್ಗಜೆಂತ್ ಕ್ರಿಯಾಳ್ ಆಸ್‌ಲ್ಲ್ಯಾ ಪರಿಂ ವಾಡ್ಯಾಂನಿ ಕ್ರಿಯಾಳ್ ಆಸೊನ್ ಜಮಾತೆಕ್ ಹಾಜರ್ ಜಾವ್ನ್, ವಾಡ್ಯಾ ಜಮಾತಿ ಆನಿಕೀ ಜಿವಾಳ್ ಜಾಂವ್ಕ್, ವಾಡ್ಯಾ ಜಮಾತೆಕ್ ಹಾಜರ್ ಜಾಂವ್ಕ್ ಉಲೊ ದಿಲೊ. ಸಚೇತಾಕ್ ಮಾನೇಸ್ತ್ ಗೊಡ್ವಿನ್ ತಾವ್ರೊ ಹಾಣಿಂ ಮಾನಾಂಚಾ ಸಯ್ರ್ಯಾಂಕ್ ಉಗ್ಡಾಸಾಚಿ ಕಾಣಿಕ್ ದೀವ್ನ್ ಮಾನ್ ಕೆಲೊ. ಪಿ.ವೈ.ಸಿ ಸಹ ಕಾರ್ಯದರ್ಶಿ ದೀಪಕ್ ಡಿಸೋಜ ಹಾಣೆಂ ಸರ್ವಾಂಚೊ ಉಪ್ಕಾರ್ ಭಾವುಡ್ನ್ ಧ‌ನ್ಯವಾದ್ ಪಾಟೈಲೆಂ. ಉಪ್ರಾಂತ್ ಸಾಂಸ್ಕೃತಿಕ್ ಕಾರ್ಯ್ಯಾಕ್ ಮಾನಾಂಚಾ ಸಯ್ರ್ಯಾಂನಿ ವೆದಿ ಸೊಡ್ನ್ ದಿಲಿ. ನಾಚ್, ಪದಾಂ ಸವೆಂ ಬಿಂಡಿ ಸೊಲಾಂ ನಾಟಕ್ (ಬರಯ್ಣಾರ್ : ಟೈಸನ್ ಮಡಂತ್ಯಾರ್, ನಿರ್ದೇಶಕ್: ಪಿ.ವೈ.ಸಿ ಸಾಂದೊ ವೆನಿಶಾ ಸಲ್ಡಾನ್ಹಾ ಕಲಾಕುಲ್, ಆನಿ ಸಂಗೀತ್ : ರೋಯ್‌ಸ್ಟನ್ ಡಿಕುನ್ಹಾ ಮಣೆಲ್) ಪಿ.ವೈ.ಸಿ ಸಾಂದ್ಯಾಂನಿ ಭೋವ್ ಅಪುರ್ಬಾಯೆನ್ ಸಾದರ್ ಕೆಲೊ. ಮನೋರಂಜನ್ ಖೆಳ್ ಆಸಾ ಕೆಲ್ಲೊ. ವಿಗಾರ್ ಬಾಪಾಂನಿ ಆನಿ ಮಂಗ್ಳುರ್ ದಿಯೆಸೆಜ್ ಐ.ಸಿ.ವೈ.ಎಮ್ ಕೇಂದ್ರೀಯ ಸಮಿತಿ ದಿರೆಕ್ತೊರ್ ಮಾ.ಬಾ.ಅಶ್ವಿನ್ ಕಾರ್ಡೊಜಾ ಹಾಣಿಂ ಖೆಳಾಂಚ್ಯಾ ವಿಜೇತಾಂಕ್ ಬಹುಮಾನ್ ವಿತರಣ್ ಕೆಲೆಂ. ಐ.ಸಿ.ವೈ.ಎಮ್ ಮಂಗ್ಳುರ್ ದಿಯೆಸೆಜ್ ಕೇಂದ್ರೀಯ ಸಮಿತಿಚೆ ಮುಖೆಲಿ ಆನಿ ಐ.ಸಿ.ವೈ.ಎಮ್ ಪೆಜಾರ್ ವಾರಾಡೊ ಮುಖೆಲಿ ಕಾರ್ಯಕ್ರಮಕ್ ಹಾಜರ್ ಆಸ್‌ಲ್ಲೆ. ಪಿ.ವೈ.ಸಿ ಧ್ಯೇಯಾ ಗೀತಾ ಸವೆಂ ಸಾಂಸ್ಕೃತಿಕ್ ಕಾರ್ಯೆಂ ಸಂಪೈಲೆಂ. ಸಾಂಸ್ಕೃತಿಕ್ ಕಾರ್ಯ್ಯಾಚಿ ಸರ್ವ್ ಜವಾಬ್ದಾರಿ ವಿಯೋಲಾ ಮೊರಾಸ್, ಪದಾಂಚಿ ಜವಾಬ್ದಾರಿ ಜಿಯಾ ಮಿನೇಜಸ್ ಆನಿ ನೈಜಿಲ್ ಪೇರಿಸ್, ನಾಚ್ಪಾಚಿ ಜವಾಬ್ದಾರಿ ಜೋಸ್ನಾ ನಜರೆತ್, ಪ್ರೀಮಾ ಮಿನೇಜಸ್ ಆನಿ ಹೆನ್ಸಿಟಾ ಡಿಕೋಸ್ತಾ ಹಾಣಿಂ ಕಾಣ್ಘೆಲ್ಲಿ. ವರ್ಧಿ ಪವರ್ ಪಾಯಿಂಟರ್ ಘಾಲ್ಚಿ ಜವಾಬ್ದಾರಿ ಶೋನ್ ಫೆರ್ನಾಂಡಿಸ್ ಆನಿ ಅಗೋಸ್ತಿನ್ ಮಿನೇಜಸ್ ಹಾಣಿಂ ಕಾಣ್ಘೆಲ್ಲಿ. ಮಾನ್ ಪತ್ರ್ ಶ್ರೀಮತಿ ಹಿಲ್ಡಾ ಮಿನೇಜಸ್ ಆನಿ ಅನಿತಾ ಫೆರ್ನಾಂಡಿಸ್ ಹಾಣಿಂ ಭೋವ್ ಅಪುರ್ಬಾಯೆನ್ ತಯಾರ್ ಕರ್ನ್ ದಿಲ್ಲೆಂ. ರೀಶಲ್ ನೊರೊನ್ಹಾ ಆನಿ ವೆನಿಶಾ ಸಲ್ಡಾನಾ ಹಾಣಿಂ ಭೋವ್ ಅಪುರ್ಬಾಯೆನ್ ಕಾರ್ಯೆಂ ನಿರ್ವಾಹಣ್ ಕೆಲೆಂ. ಸಗ್ಳ್ಯಾ ಕಾರ್ಯ್ಯಾಕ್ ಲಗ್ಬಕ್ 550 ಫಿರ್ಗಜ್‌ಗಾರಾಂ ಹಾಜರ್ ಆಸ್ಲಿಂ. ಪಿ.ವೈ.ಸಿ - ಐ.ಸಿ.ವೈ.ಎಮ್ ದಿರೆಕ್ತೊರಾಚಾ ಮಾರ್ಗದರ್ಶನಾನ್, ಅಧ್ಯಕ್ಷ್, ಕಾರ್ಯದರ್ಶಿ, ಸಚೇತಕ್ ಆನಿ ಕೋರ್ ಕಮಿಟಿ ಆನಿ ಸರ್ವ್ ಸಾಂದ್ಯಾಂಚಾ ಸಹಕಾರನ್ ಪಿ.ವೈ.ಸಿ ವಾರ್ಷಿಕೋತ್ಸವ್ ಯಶಸ್ವಿ ಜಾಲೊ. ಹಾಜರ್ ಆಸ್ಲ್ಯಾ ಸರ್ವ್ ಫಿರ್ಗಜ್‌ಗಾರಾಂಕ್ ಪಿ.ವೈ.ಸಿ - ಐ.ಸಿ.ವೈ.ಎಮ್ ಸಾಂದ್ಯಾನಿ ಪಫ್ಸ್ ಆನಿ ಮಾಲ್ಟ್ ದೀವ್ನ್ ಧಾದೊಶಿ ಕೆಲೆಂ.