ಸೈಬರ್ ಕ್ರೈಮ್ ಮಾಹೆತ್ ಶಿಬಿರ್ - 2025
ಸಾಮಾಜಿಕ್ ಸಂವಹನ್ ಆಯೋಗ್ ಆನಿ ಬಜ್ಪೆ ಪೊಲೀಸ್ ಅಧಿಕಾರಿ, ಹಾಂಚ್ಯಾ ಸಾಂಗಾತ್ಪಣಾನ್, ಜುಲೈ ಮಹಿನ್ಯಾಚಾ 13 ತಾರಿಕೆರ್ ಆಯ್ತಾರಾ ಸಕಾಳಿಂ ಮಿಸಾ ಉಪ್ರಾಂತ್, ಶತಾಬ್ದಿ ಸ್ಮಾರಕ್ ಭವನಾಂತ್ ಸೈಬರ್ ಕ್ರೈಮ್ ಮಾಹೆತ್ ಶಿಬಿರ್ ಮಾಂಡುನ್‌ ಹಾಡ್ಲೆಂ. ಹ್ಯಾ ಕಾರ್ಯಕ್ರಮಾಕ್ ಫಿರ್ಗಜ್ ವಿಗಾರ್ ಭೊI ಮಾI ಬಾI ರುಡೋಲ್ಫ್ ರವಿ ಡೆಸಾ, ಫಿರ್ಗಜ್ ಗೊವ್ಳಿಕ್ ಪರಿಷಧ್ ಉಪಾಧ್ಯಕ್ಷ್ ಶ್ರೀಮಾನ್ ರೋಮನ್ಸ್ ಲೋಬೊ, ಆನಿ ಬಜ್ಪೆ ಪೊಲೀಸ್ ಠಾಣೆಚೆಂ ಅಧಿಕಾರಿ ಜಾವ್ನ್ ಪಿ. ಎಸ್. ಐ ಅಶೋಕ್, ಆನಿ ಸಿಬಂದಿ ಅನಿಲ್, ಗುರುಪ್ರಸಾದ್ ಹಾಜರ್ ಆಸ್‌ಲ್ಲೆ. ಸಂಚಾಲಕ್ ಗ್ಲೆನ್ ರೋಶನ್ ಡಿಕುನ್ಹಾ ಹಾಣಿಂ ಜಮ್ಲೆಲ್ಯಾ ಮಾನಾಂಚಾ ಸಯ್ರ್ಯಾಂಕ್ ಆನಿ ಸರ್ವಾಂಕ್ ಮೊಗಾಚೊ ಎವ್ಕಾರ್ ಮಾಗ್ಲೊ.
ಬಜ್ಪೆ ಪಿ. ಎಸ್. ಐ ಅಶೋಕ್ ಆನಿ ಸಾಂಗಾತಾ ಪೊಲೀಸ್ ಅನಿಲ್, ಹಾಣಿಂ ಸೈಬರ್ ಕ್ರೈಮಾ ವಿಶ್ಯಾಂತ್ ಆಮ್ಚ್ಯಾ ಪರಿಸರಾಂತ್ ಘಡ್‌ಲ್ಲ್ಯಾ ಘಡಿತಾಂ ಮುಖಾಂತ್ರ್ ವಿವರ್ ದೀವ್ನ್ ಕಸೆಂ ಆಮಿ ಸೈಬರ್ ಕ್ರೈಮಾಕ್ ಸಾಂಪಾಡ್ತಾಂವ್ ಆಮಿ ಅಂತರ್ ಜಾಳಿರ್ ಆಯಿಲೆ ವಾ ಸಾಂಗ್‌ಲ್ಲೆ ಪಾತ್ಯೆ ನಾಸ್ತಾಂ ಜಾಗ್ರುತ್ ರಾವಜೆ ಆನಿ ಕಿತೆಂಯ್ ತೊಂದ್ರೆ ಜಾಲ್ಯಾರ್ ಪೊಲೀಸ್ ಅಧಿಕಾರಿಂಕ್ ತಿಳ್ಸಿಜೆ ಮ್ಹಣ್ ಸವಿಸ್ತಾರ್ ರಿತಿನ್ ಮಾಹೆತ್ ದಿಲಿ.
ವಿಗಾರ್ ಬಾಪಾಂನಿ ಸೈಬರ್ ಕ್ರೈಮ್ ವಿಶ್ಯಾಂತ್ ಸವಿಸ್ತಾರ್ ಮಾಹೆತ್ ದಿಲ್ಲ್ಯಾ ಬಜ್ಪೆ ಪೊಲೀಸ್ ಅಧಿಕಾರಿ ಆನಿ ಸಾಂಗಾತ್ಯಾಂಚೊ ಉಪ್ಕಾರ್ ಭಾವುಡ್ಲೊ. ಶ್ರೀ ಮೆಲ್ವಿನ್ ಸಲ್ಡಾನ್ಹಾ ಹಾಣಿಂ ತಸ್ವಿರ್ ಕಾಡ್ನ್ ಸಹಕರ್ಸಿಲೆಂ. ಲಗ್ಬಗ್ 210 ಫಿರ್ಗಜ್ಗಾರಾಂ ಹಾಜರ್ ಜಾವ್ನ್ ಸೈಬರ್ ಕ್ರೈಮ್ ಹಾಚ್ಯಾ ವಿಶ್ಯಾಂತ್ ಮಾಹೆತ್ ಜೊಡ್ನ್ ಫಾಯ್ದೊ ಜೊಡ್ಲೊ.