ದೇವ್ ಮಾತೆಚಿ ಪರಬ್ ಆನಿ ನವ್ಯಾ ವರ್ಸಾಚೊ ಸಂಭ್ರಮ್ - 2025

ದೇವ್ ಮಾತೆಚಿ ಪರಬ್ ಆನಿ ನವ್ಯಾ ವರ್ಸಾಚೊ ಸಂಭ್ರಮ್ ದಸೆಂಬರ್ 31 ವೆರ್ ರಾತಿಂ 8:00 ವ್ಹರಾರ್ ವ್ಹಡಾ ದಬಾಜೆನ್ ಸಂಭ್ರಮ್ಲೊ. ಪಯ್ಲೆಂ ಸಾಂಜೆರ್ 7 ಥಾವ್ನ್ 8 ವ್ಹರಾಂ ಪರ್ಯಾಂತ್ ದಿಯಾಕೊನ್ ಬಾಪ್ ವಿಕಾಸ್ ಪಿರೇರಾ ಹಾಣಿಂ 2024 ವ್ಯಾ ವರ್ಸಾ ಮೆಳ್'ಲ್ಲ್ಯಾ ಸರ್ವ್ ಉಪ್ಕಾರಾಂಕ್ ಅರ್ಗಾಂ ಜಾವ್ನ್ ಆನಿ ನವ್ಯಾ ವರ್ಸಾಕ್ ಆಧಾರ್ ಮಾಗೊನ್ ಭಕ್ತಿಪಣಿ ಭೋವ್ ಅಪುರ್ಬಾಯೆನ್ ಗಾಯನ್ ಮಂಡಳಿಚ್ಯಾ ಸಹಕಾರನ್ ಆರಾಧನ್ ಚಲವ್ನ್ ವೆಲೆಂ. ಉಪ್ರಾಂತ್ ಸಂಭ್ರಮಿಕ್ ಮಿಸಾಚೆ ಬಲಿದಾನ್ ಭೆಟಯ್ಲೆಂ. ಮಂಗ್ಳುರ್ ದಿಯೆಸೆಜಿಚ್ಯಾ ರಾಕ್ಣೊ ಪತ್ರಾಚೆ ಸಂಪಾದಕ್ ಮಾ|ಬಾ| ರೂಪೇಶ್ ಮಾಡ್ತಾ ಹಾಣಿಂ ಪ್ರಧಾನ್ ಯಾಜಕ್ ಜಾವ್ನ್ ಮಿಸಾಚೆ ಬಲಿದಾನ್ ಭೆಟವ್ನ್ ಮರಿ ದೆವಾಚಿ ಮಾತಾ, ತಿ ವರ್ತಿ ಜಾವ್ನಾಸಾ. ಖಂಚ್ಯಾಯ್ ರಚ್ನೆಕ್ ಫಾವೊ ಜಾವ್ನಾತ್'ಲ್ಲೊ ಮಾನ್ ತಿಕಾ ಫಾವೊ ಜಾಲ್ಲೊ. ಕಾರಣ್ ತಿಚೆಂ ವಿಶ್ವಾಸ್'ಪಣ್ ಆನಿ ಖಾಲ್ತೆಪಣ್. ಮರಿಯೆ ಬರಿ ಆಮಿಯ್ ವಿಶ್ವಾಸಿ ಆನಿ ಖಾಲ್ತಿ ಜಾಲ್ಯಾರ್ ದೇವ್ ಆಮ್ಕಾಂಯ್ ವರ್ತೊ ಕರ್ತೊಲೊ ಮ್ಹಣ್ ಅರ್ಥಭರಿತ್ ಪ್ರಸಂಗ್ ದಿಲೊ. ಫಿರ್ಗಜ್ ವಿಗಾರ್ ಭೊ।ಮಾI ರುಡೊಲ್ಫ್ ರವಿ ಡೆಸಾ, ಮಾ।ಬಾ। ದೊ. ಪಿಯುಸ್ ಫಿದೆಲಿಸ್ ಪಿಂಟೊ, ದಿಯಾಕೊನ್ ವಿಕಾಸ್ ಪಿರೇರಾ ಹಾಣಿಂ ಸಹ ಭೆಟವ್ಣಿ ಕೆಲಿ. ನವ್ಯಾ ವರ್ಸಾಚೊ ಸಂಭ್ರಮ್ ಸಂಭ್ರಮುಕ್ ಸಹಕಾರ್ ದಿಲ್ಲ್ಯಾ ಸರ್ವಾಂಚೊ ವಿಗಾರ್ ಬಾಪಾಂನಿ ಉಪ್ಕಾರ್ ಭಾವುಡ್ಲೊ. ಮುಡ್ದೊಮ್ ಗಾರಾಂಕ್ ವಾತಿ ದೀಂವ್ನ್ ಮಾನ್ ಕೆಲೊ. ಹ್ಯಾಚ್ಚ್ ವೆಳಾ ಪೊಂಪೈಚೆಂ ಫಾಲ್ಕೆಂ ಪತ್ರಾಚೊ “ನತಲಾಂ ಫೆಸ್ತಾಚೊ ಆನಿ ನವ್ಯಾ ವರ್ಸಾಚೊ ಅಂಕೊ” ಮಾ।ಬಾ। ರೂಪೇಶ್ ಮಾಡ್ತಾ ಹಾಣಿಂ ಮೊಕ್ಳಿಕ್ ಕೆಲೊ. ಮೊಕ್ಳಿಕ್ ಕಾರ್ಯೆಂ ಡಾ। ಗೊಡ್ವಿನ್ ಲೋಬೊನ್ ಚಲವ್ನ್ ವೆಲೆಂ. ಕು.ರೀಶಾಲ್ ನೊರೊನ್ಹಾ ಹಾಣೆಂ ದೇವ್ ಸ್ತುತೆಚೆ ನಿರ್ವಹಣ್ ಕೆಲೆಂ. ಶ್ರೀ ದೀಪಕ್ ಡಿಸೋಜ ಹಾಣೆಂ ತಸ್ವೀರ್ಯೊ ಕಾಡ್ನ್ ಸಹಕರ್ಸಿಲೆಂ. ಲಗ್ನಾ ಜಿವಿತಾಚೊ 30 ವೊ ವಾರ್ಷಿಕೋತ್ಸವ್ ಸಂಭ್ರಮ್ಚ್ಯಾ ಶ್ರೀ ಹೆರಾಲ್ಡ್ ಲೋಬೊ ಕುಟ್ಮಾನ್ ಸರ್ವಾಂಕ್ ಕೇಕ್ ಆನಿ ಕಾಫಿ ಆಸಾ ಕೆಲ್ಲಿ. ಸರ್ವಾಂನಿ ಸೆವ್ನ್ ನವ್ಯಾ ವರ್ಸಾಚೊ ಸಂಭ್ರಮ್ ದೊಡ್ತೊ ಕೆಲೊ.