ಪ್ರಾಚಿತ್ ಕಾಳಾಚಿ ವಾರ್ಷಿಕ್ ರೆತಿರ್ (ಜುಬ್ಲೆವ್ - 2025)
ಮಾರ್ಚ್ ಮಹಿನ್ಯಾಚಾ 30, 31 ಆನಿ ಏಪ್ರಿಲ್ ಮಹಿನ್ಯಾಚಾ 1, 2 ತಾರಿಕೆರ್ ಆಮ್ಚ್ಯಾ ಫಿರ್ಗಜೆಂತ್ ಜೆಜುಚ್ಯಾ ಜಲ್ಮಾಚ್ಯಾ ಜುಬ್ಲೆವ್ ವರ್ಸಾಕ್ ವಾರ್ಷಿಕ್ ರೆತಿರ್ ಆಸಾ ಕೆಲ್ಲಿ. ಮಾರ್ಚ್ ಮಹಿನ್ಯಾಚಾ 30 ತಾರಿಕೆರ್ ಆಯ್ತಾರಾ ಸಕಾಳಿಂಚಾ ಮೀಸಾ ಸವೆಂ "ಭರ್ವಸೊ ನಿರಾಶಿ ಕರಿನಾಂ" (ರೋಮ್ 5:5) ಮ್ಹಳ್ಳ್ಯಾ ಧ್ಯೇಯಾಖಾಲ್ ರೆತಿರ್ ಆರಂಭ್ ಕೆಲಿ. ಮಂಗ್ಳುರ್ ದಿಯೆಸೆಜ್ ಮಂಗಳ ಜ್ಯೋತಿ ದಿರೆಕ್ತೊರ್ ಮಾI ಬಾI ವಿಜಯ್ ಮಚಾದೊ ಹಾಣಿಂ ಪ್ರದಾನ್ ಯಾಜಕ್ ಜಾವ್ನ್ ಪವಿತ್ರ್ ಮಿಸಾಚೆ ಬಲಿದಾನ್ ಭೆಟಯ್ಲೆಂ. ಆಮ್ಚೆಂ ಫಿರ್ಗಜ್ ವಿಗಾರ್ ಭೊI ಮಾI ಬಾI ರುಡೊಲ್ಫ್ ರವಿ ಡೆಸಾ ಆನಿ ದಿಯೊಕಾನ್ ಬಾಪ್ ವಿಕಾಸ್ ಪಿರೇರಾ ಹಾಣಿಂ ಮಿಸಾಚಿ ಸಹ ಭಟವ್ಣಿ ಕೆಲಿ. ಬಾಪ್ ವಿಜಯ್ ಮಚಾದೊ ಹಾಣಿಂ ದೆವಾಚ್ಯಾ ಉತ್ರಾಂಚೆರ್ ಭೋವ್ ಅರ್ಥಾಭರಿತ್ ರಿತಿನ್ ಪ್ರವಚನ್ ದಿಲೆಂ.
ರೆತಿರೆಚ್ಯಾ ಪಯ್ಲ್ಯಾ ದೀಸಾ ದೇವ್ ಆಮ್ಚೊ ಮೋಗ್ ಕರ್ತಾ ಆನಿ ಆಮ್ಚ್ಯಾ ಭಾವಾರ್ಥ ವಿಶ್ಯಾಂತ್ ಪವಿತ್ರ್ ಪುಸ್ತಾಕಾಂತ್ಲ್ಯಾ ವಿವಿಧ್ ದೃಷ್ಟಾಂತಾ ಮುಖಾಂತ್ರ್ ಆಮ್ಚೊ ಭಾವಾರ್ಥ್ ಘಟ್ ಕರ್ನ್ ಎಕಾ ನೀಜಾ ದೆವಾಕ್ ಪಾತ್ಯೆವ್ನ್ ಆಮ್ಚ್ಯಾ ಭಾವಾರ್ಥಾಚೆ ದೊಳೆ, ಕಾನ್ ಉಗಡ್ನ್ ಕಷ್ಟಾಂಚಾ ವೆಳಾರ್ ಆಮ್ಚೊ ಭಾವಾರ್ಥ್ ದಂಡಾಳ್ನಾಸ್ತಾ ರಾವೊಂಕ್ ಮಾಹೆತ್ ದಿಲಿ. ಮೀಸಾ ಉಪ್ರಾಂತ್ ಥಂಡ್ ಪೀವನ್ ಸೆವ್ನ್ ಜಾತಾಚ್ ಮಾIಬಾ ವಿಜಯ್ ಮಚಾದೊ ಹಾಣಿಂ ರೆತಿರ್ ಮುಂದರ್ಸುನ್ ವ್ಹೆಲಿ. ಅರ್ಗಾಂ ಹೊಗ್ಳಾಪಾ ವಿಶ್ಯಾಂತ್ ಆನಿ ಸೊಧಾ ಪಯ್ಲೆಂ ದೆವಾಚೆಂ ರಾಜ್ ಹ್ಯಾ ವಿಶ್ಯಾಂತ್ ತಿಳ್ಸಿಲೆಂ. ಉಪ್ರಾಂತ್ ಆರಾಧಾನ್ ಚಲವ್ನ್ ವ್ಹೆಲೆಂ.
ದುಸ್ರ್ಯಾ ದೀಸಾ ಕ್ರಿಸ್ತಾಂವ್ ಜಿವಿತಾಚೊ ಉದ್ದೇಶ್ ಹ್ಯಾ ವಿಶ್ಯಾಂತ್ ಆಮಿ ಸೊಮ್ಯಾ ಸಾಂಗಾತಾ ರಾವೊನ್ ಕಸೆಂ ಆಮಿ ಕುಟ್ಮಾಂತ್, ವಾಡ್ಯಾಂತ್ ಆನಿ ಫಿರ್ಗಜೆಂತ್ ಜಿಯೆಂವ್ಚೆ ಮ್ಹಳ್ಳ್ಯಾ ವಿಶ್ಯಾಂತ್ ದೆವಾಚೊ ಮೋಗ್ ಆನಿ ಉಪದೆಸ್ ದೆವಾಚ್ಯಾ ಮೊಗಾಚಿ ಲಕ್ಷಣಾಂ ಆನಿ ದೆವಾಚ್ಯಾ 10 ಉಪದೆಸಾ ವಿಶ್ಯಾಂತ್ ಆನಿ ಭಾವಾಡ್ತಾ ವಿರೋಧ್ ವೆಚಿಂ ಪಾತ್ಕಾಂ ವಿಶಿಂ ಥೊಡಿಂ ದೃಷ್ಟಾಂತಾ ಮುಖಾಂತ್ರ್ ಪ್ರವಚನ್ ದಿಲೆಂ. ಭಾವಾಡ್ತ್ ಘಟ್ ಕರಿಜೆ ಜಾಲ್ಯಾರ್ ಮಾಗ್ಣೆಂ ಗರ್ಜ್ ಜಾವ್ನಾಸಾ. ಆಮ್ಚ್ಯಾ ಜಿವಿತಾಂತ್ ಹರ್ಯೆಕಾಕಿ ವೇಳ್ ದವರಿಜೆ. ಮಾಗ್ಣೆಂ ಆನಿ ಸದಾಂಚೆ ಜಿವಿತ್ ಸಮತೋಲನ್ ಆಸಾಜೆ. ಭಾವಾಡ್ತಾ ವರ್ವಿಂ ಆಜಾಪಾಂ ಘಡ್ತಾತ್. ಜೆಜು ಮರಿ ಜುಜೆ ಆಮ್ಚ್ಯಾ ಕುಟ್ಮಾಂತ್ ಆಸ್ಲ್ಯಾರ್ ಆಮ್ಕಾಂ ಕಿತೇಂಯ್ ಉಣೆಂ ನಾಂ. ಮ್ಹಳ್ಳ್ಯಾ ವಿಶ್ಯಾಂತ್ ಮಾಹೆತ್ ದಿಲಿ.
ತಿಸ್ರ್ಯಾ ದೀಸಾ ಪಾತಕ್ ಮ್ಹಳ್ಯಾರ್ ಕಿತೆಂ ಪಾತ್ಕಾಂತ್ ತೀನ್ ಥರಾಂಚಿ ಭಗಪ್ ಕುಡಿಚೆ, ಮತಿಚಿ, ಅತ್ಮ್ಯಾಚಿ ಹ್ಯಾ ವಿಶ್ಯಾಂತ್ ತಿಳ್ಸುನ್ ದೇವ್ ಸರ್ವಾಂಚೊ ಮೋಗ್ ಕರ್ತಾ ಪಾತ್ಕಾಚೆಂ ಭಗ್ಸಾಣೆಂ ಆನಿ ಸುಟ್ಕಾ ದಿತಾ. ಪವಿತ್ರ್ ಅತ್ಮ್ಯಾಚ್ಯಾ ದೆಣ್ಯಾಂ ಆನಿ ಫಳಾಂ ವಿಶ್ಯಾಂತ್ ಮಾಹೆತ್ ದೀವ್ನ್ ಆಂತರಿಕ್ ಭಲಾಯ್ಕೆ ವಿಶ್ಯಾಂತ್ ಮಾಗ್ಣೆಂ ಭೆಟವ್ನ್, ಕುಮ್ಸಾರಾಕ್ ತಯಾರಾಯ್ ಕರ್ನ್ ಸುಟಾವೆಂ ಕುಮ್ಸಾರ್ ಜಾಲ್ಯಾರ್ ಆಜಾಪಾಂ ಜಾತಾತ್ ಮ್ಹಳ್ಳಿ ಥೊಡಿಂ ದೃಷ್ಟಾಂತಾ ದೀವ್ನ್ ಪ್ರವಚನ್ ದಿಲೆಂ. ಕುಮ್ಸಾರಾಚ್ಯಾ ಸಾಕ್ರಾಮೆಂತಾ ಮುಖಾಂತ್ರ್ ಎಕಾಮೆಕಾ ರಾಜಿ ಜಾವ್ನ್ ಪೆಲ್ಯಾಚೊ ಮೋಗ್ ಕರ್ನ್ ಆಮಿ ದೆವಾಚ್ಯಾ ಮೊಗಾಂತ್ ರಾವೊಂಕ್ ಸವಿಸ್ತಾರ್ ರಿತಿನ್ ಪ್ರವಚನ್ ದೀವ್ನ್ 3 ದೀಸಾಂಚಾ ರೆತಿರೆಂತ್ ಆಮ್ಚೆ ಥಂಯ್ ಆಸ್ಲೆ ವಾಯ್ಟ್ ಪಯ್ಸ್ ಕರ್ನ್ ಪವಿತ್ರ್ ಅತ್ಮ್ಯಾ ಥಂಯ್ ಭರೊನ್ ಸಂಪೂರ್ಣ್ ರಿತಿನ್ ದೆವಾಕ್ ಸಮರ್ಪುನ್ ಅರ್ಗಾಂ ಹೊಗ್ಳಾಪ್, ಆರಾಧಾನ್ ಕರ್ನ್ ದೆವಾಕ್ ಅರ್ಗಾಂ ಪಾಟವ್ನ್ ಆಮ್ಚ್ಯಾ ಪಾತ್ಕಾಂಚ್ಯಾ ಸುಟ್ಕೆ ಖಾತಿರ್ ಆನಿ ವಿವಿಧ್ ಗರ್ಜೊ, ಸ್ತೆಸಾಂವಾ ಖಾತಿರ್ ಮಾಗ್ಣೆಂ ಭೆಟವ್ನ್ ಪವಿತ್ರ್ ಪುಸ್ತಕ್ ಸದಾಂಚ್ ವಾಚುನ್ ನಿಯಾಳ್ನ್ ದೆವಾಚಿ ಕುರ್ಪಾ ಸದಾಂಚ್ ಜೊಡ್ನ್ ಭರ್ವಸೊ ನಿರಾಶಿ ಕರಿನಾಂ ಮ್ಹಣ್ ಪವಿತ್ರ್ ಪುಸ್ತಕಾಚ್ಯಾ ಉತ್ರಾದ್ವಾರಿಂ ದೆವಾಚೆರ್ ಆಖಂಡ್ ಭಾವಾರ್ಥ್ ದವರ್ನ್ ಜಿವಿತ್ ಭಾಂದುನ್ ಹಾಡ್ನ್ ಸೊಮ್ಯಾ ಸಾಂಗಾತಾ ರಾವೊನ್ ಆಮ್ಚ್ಯಾ ಜಿಣ್ಯೆಂತ್ ಪ್ರಗತಿ ಜೊಡ್ಯಾಂ ಮ್ಹಣ್ ಪ್ರವಚನ್ ದಿಲೆಂ. ಉಪ್ರಾಂತ್ ಪವಿತ್ರ್ ಉದಾಕ್ ಸರ್ವಾಂಚೆರ್ ಶೆಣಾವ್ನ್ ಪವಿತ್ರ್ ಅತ್ಮ್ಯಾಚಿ ಸಸಾಯ್ ಮಾಗೊನ್, ಸಾಕ್ರಮೆಂತಾಚೊ ಆಶೀರ್ವಾದ್ ಸರ್ವಾಂಚೆರ್ ಮಾಗ್ಲೊ. ವಿಗಾರ್ ಬಾಪಾಂನಿ ಭೋವ್ ಅಪುರ್ಬಾಯೆನ್ ದೆವಾಚ್ಯಾ ಉತ್ರಾಚೊ ನಿಯಾಳ್ ದೀವ್ನ್ ರೆತಿರ್ ಚಲವ್ನ್ ವರ್ನ್ ಪ್ರವಚನ್ ದಿಲ್ಲ್ಯಾ ಮಾ| ಬಾ| ವಿಜಯ್ ಮಚಾದೊ ಹಾಂಚೊ ಉಪ್ಕಾರ್ ಭಾವುಡ್ಲೊ. ಆನಿ ವ್ಹಡಾ ಸಂಖ್ಯಾನ್ ಹಾಜರ್ ಜಾಲ್ಲ್ಯಾ ಫಿರ್ಗಜ್‌ಗಾರಾಂಚೊ ಉಪ್ಕಾರ್ ಭಾವುಡ್ಲೊ. ಆವ್ಮರಿ ಆನಿ ಸೊಮ್ಯಾಕ್ ಧಿನ್ವಾಸುಯಾಂ ಮ್ಹಳ್ಳ್ಯಾ ಗೀತಾ ಸವೆಂ ರೆತಿರ್ ಸಂಪೈಲಿ. ಲಗ್ಬಗ್ 550 ಫಿರ್ಗಜ್ಗಾರಾಂನಿ ರೆತಿರೆಂತ್ ಭಾಗ್ ಘೆವ್ನ್ ದೆವಾಚಿ ಕುರ್ಪಾ ಜೊಡ್ನ್ ರೆತಿರ್ ಫಳಾಧಿಕ್ ಜಾಂವ್ಕ್ ಪಾವ್ಲಿ. ಶೋನ್ ಫೆರ್ನಾಂಡಿಸ್ ಹಾಣೆಂ ಭೋವ್ ಅಪುರ್ಬಾಯೆನ್ ಕೀಬೋರ್ಡ್ ವಾಜವ್ನ್ ಖಂತಾರಾ ಗಾಂವ್ಕ್ ಸಹಾಕಾರ್ ದಿಲೊ.
ಚವ್ತ್ಯಾ ದೀಸಾ ಕುಮ್ಸಾರಾಂ ಆನಿ ಸಾಕ್ರಾಮೆಂತಾಚೆ ಆರಾಧಾನ್ ಏಪ್ರಿಲ್ ಮಹಿನ್ಯಾಚಾ 2 ತಾರಿಕೆರ್ ಬುದ್ವಾರಾ ಸಾಂಜೆರ್ 4.00 ವೊರಾಂ ಥಾವ್ನ್ 5.30 ವೊರಾಂ ಮ್ಹಣಾಸರ್ ಕುಮ್ಸಾರಾಂ ಆನಿ 5.30 ವೊರಾಂ ಥಾವ್ನ್ 7.30 ವೊರಾಂ ಪರ್ಯಾಂತ್ ಸಾಕ್ರಾಮೆಂತಾಚೆ ಸಾಮೂಹಿಕ್ ಆರಾಧಾನ್ ಆಸಾ ಕೆಲ್ಲೆಂ. ಫಿರ್ಗಜ್ ವಿಗಾರ್ ಭೊI ಮಾI ಬಾI ರುಡೋಲ್ಫ್ ರವಿ ಡೆಸಾ ಆನಿ ಪವಿತ್ರ್ ಮಿಸಾಚೆಂ ಬಲಿದಾನ್ ಭೆಟವ್ನ್ ಕುಮ್ಸಾರ್ ಜಾಲ್ಲ್ಯಾ ವರ್ವಿಂ ಆಮ್ಕಾಂ ಚಡ್ ಆನಿ ಚಡ್ ದೆವಾಚ್ಯಾ ಮೊಗಾಂತ್ ರಾಂವೊಕ್ ಜಾತಾ ಮ್ಹಣ್ ಭೋವ್ ಅರ್ಥಾಭರಿತ್ ರಿತಿನ್ ಪ್ರವಚನ್ ದಿಲೆಂ. ದಿಯೊಕಾನ್ ಬಾಪ್ ವಿಕಾಸ್ ಪಿರೇರಾ ಹಾಣಿಂ ಭೋವ್ ಅಪುರ್ಬಾಯೆನ್ ಸಾಕ್ರಾಮೆಂತಾಚೆ ಆರಾಧಾನ್ ಚಲವ್ನ್ ವರ್ನ್ ಸಗ್ಳ್ಯಾ ಫಿರ್ಗಜ್ ಕುಟ್ಮಾಚ್ಯಾ ಇರಾದ್ಯಾ ಪಾಸತ್ ಮಾಗ್ಣಿಂ ಭೆಟವ್ನ್ ದೆವಾಕ್ ಅರ್ಗಾಂ ಹೊಗ್ಳಾಪ್ ದೀವ್ನ್ ಸರ್ವಾಂಚೆರ್ ದೆವಾಚೊ ಆಶೀರ್ವಾದ್ ಮಾಗ್ಲೊ. ವಿಗಾರ್ ಬಾಪಾಂನಿ ಆರಾಧಾನ್ ಚಲವ್ನ್ ವೆಲ್ಲ್ಯಾ ದಿಯೊಕಾನ್ ಬಾಪ್ ವಿಕಾಸ್ ಪಿರೇರಾ ಆನಿ ಹಾಜರ್ ಆಸ್ಲ್ಯಾ ಸರ್ವಾಂಚೊ ಉಪ್ಕಾರ್ ಭಾವುಡ್ಲೊ. ರೆತಿರೆಚೆ 4 ದೀಸ್ ಸರ್ವ್ ಫಿರ್ಗಜ್ಗಾರಾಂಕ್ ಸಮಾಧಾನೆಚೆ ಆನಿ ದೆವಾಚ್ಯಾ ಕುರ್ಪೆಚೆ ಜಾಂವ್ಕ್ ಪಾವೊನ್ ದೆವಾಚೊ ಆಶೀರ್ವಾದ್ ಜೊಡ್ನ್ ಘೆತ್ಲೊ. ಲಗ್ಬಕ್ 550 ಫಿರ್ಗಜ್ಗಾರಾಂ ಹಾಜರ್ ಆಸ್‌ಲ್ಲಿಂ. ಶೋನ್ ಫೆರ್ನಾಂಡಿಸ್ ಹಾಣೆಂ ತಸ್ವಿರ್ ಕಾಡ್ನ್ ಸಹಕರ್ಸಿಲೆಂ.