ವಡ್ಲೆಂ ಫೆಸ್ತ್ - 2024

ನವೆಂಬರ್ 6 ತಾರ್ಕೆರ್ ಬುದ್ವಾರಾ ವ್ಹಡಾ ದಬಾಜಾನ್ ಫಿರ್ಗಜ್ ಫೆಸ್ತ್ (ವಡ್ಲೆಂ ಫೆಸ್ತ್) ಸಂಭ್ರಮ್ಲೆಂ. ಸಕಾಳಿಂ 9:30 ವ್ಹರಾರ್ ಪೊಂಪೈ ಸಭಾ ಭವನ ಲಾಗಿಂ ಫಿರ್ಜೆಂತ್ ರಾವ್'ಲ್ಲ್ಯಾ ತೀನೀ ಕುಟ್ಮಾಂಚಾಂಕ್ ಫಿರ್ಗಜ್ ವಿಗಾರ್ ಭೊ। ಮಾ। ಬಾ। ರುಡೋಲ್ಫ್ ರವಿ ಡೆಸಾ, ಫಿರ್ಗಜ್ ಯಾಜಕ್ ಮಾ।ಬಾ।ದೊ. ಪಿಯುಸ್ ಪಿಧೆಲಿಸ್ ಪಿಂಟೊ, ದಿಯಾಕೊನ್ ವಿಕಾಸ್ ಪಿರೇರಾ ಹಾಣಿಂ ಗೊವ್ಳಿಕ್ ಪರಿಷದ್ ಉಪಾಧ್ಯಕ್ಷ್, ಕಾರ್ಯದರ್ಶಿ, ಸಾಂದ್ಯಾ ಬರಾಬರ್ ಸ್ವಾಗತ್ ಕರ್ನ್ ಬ್ಯಾಂಡಚಾ ನಾದರ್ ಪುರ್ಶಾಂವಾರ್ ದೇವ್ ತೆಂಪ್ಲಾಕ್ ಯೆವ್ಕಾರ್ ಮಾಗ್ಲೊ. ಉಪ್ರಾಂತ್ ಫಿರ್ಗಜ್ ಫೆಸ್ತಾಕ್ ಮುಡ್ದೊಮ್ ದಿಲ್ಲ್ಯಾಂಕ್ ಆನಿ ಪ್ರಾಯೋಜಕ್ ಜಾವ್ನ್ ಸಹಕರ್ಸಿಲ್ಲ್ಯಾಂಕ್ ಮಾನಾಚೊ ವಾತಿ ವಾಂಟ್ಲ್ಯೊ. ತೊಟ್ಟಾಂ ಫಿರ್ಗಜೆಚೆ ವಿಗಾರ್ ತಶೆಂಚ್ ಉಡುಪಿ ದಿಯೆಸೆಜಿಚೆ PRO , ಮಾ| ಬಾ| ಡೆನಿಸ್ ಡೆಸಾ ಹಾಣಿಂ ಪ್ರಧಾನ್ ಯಾಜಕ್ ಜಾವ್ನ್ ಫೆಸ್ತಾಚೆ ಸಂಭ್ರಮಿಕ್ ಅರ್ಗಾಂ ಬಲಿದಾನ್ ಭೆಟಯ್ಲೆಂ. ಮರಿಯೆಚೆಂ ಸ್ತುತಿ ಗಾಯಾನ್ ಆಮ್ಕಾಂ ಭರ್ವಶ್ಯಾಚಿಂ ಯಾತ್ರಿಕಾಂ ಜಾಂವ್ಕ್ ಪ್ರೇರಣ್ ಮ್ಹಳ್ಳ್ಯಾ ಸಂದೇಶಾಖಾಲ್ ಗೂಂಡ್ ಚಿಂತ್ಪಾನ್ ಭರ್ಲೆಲೊ, ಅರ್ಥಭರಿತ್ ಪ್ರವಚನ್ ದೀವ್ನ್ ಹೊ ಸಂದೇಶ್ ಚಾಲ್ತ್ಯಾ ಜೀವನಾಂತ್ ರುತಾ ಕರುಂಕ್ ಉಲೊ ದಿಲೊ. ಫಿರ್ಗಜ್ ವಿಗಾರ್ ಭೊ।ಮಾ|ಬಾ| ರುಡೋಲ್ಫ್ ರವಿ ಡೆಸಾ ಸಂಗಿ ವಾರಾಡ್ಯಾಚೆ ಆನಿ ಸಯ್ರೆ ಯಾಜಕ್ ಬಾಪಾಂನಿ ಸಹ ಭೆಟವ್ಣಿ ಕೆಲಿ. 28 ಯಾಜಕ್ ಬಾಪ್ ಹಾಜರ್ ಆಸ್'ಲ್ಲೆ. ಗಾಯಾನ್ ಮಂಡಳಿಚಾ ಸುಮಧುರ್ ಗಾಯನಾನ್ ಫೆಸ್ತಾಚೊ ಸಂಭ್ರಮ್ ಚಡಯ್ಲೊ. ವಿಗಾರ್ ಬಾಪಾಂನಿ ಫಿರ್ಜೆಂತಿಂಕ್ ವಾತಿ ದೀವ್ನ್ ಮಾನ್ ಕೆಲೊ. ತಶೆಂಚ್ ವ್ಹಡಾ ಸಂಭ್ರಮಾನ್ ಫೆಸ್ತ್ ಆಚರ್ಸುಂಕ್ ಸಹಕಾರ್ ದಿಲ್ಲ್ಯಾ ಸರ್ವಾಂಚೊ ತಶೆಂಚ್ಚ್ ವ್ಹಡಾ ಸಂಖ್ಯಾನ್ ಯೇವ್ನ್ ಫೆಸ್ತಾಚೊ ಸಂಭ್ರಮ್ ಚಡಯಿಲ್ಲ್ಯಾ ಸರ್ವ್ ಯಾಜಕ್ ಬಾಪಾಂಚೊ ಉಪ್ಕಾರ್ ಭಾವುಡ್ಲೊ. ಫಿರ್ಗಜೆಚಿ ನವಿ ಅಂತರ್ ಜಾಳ್ (Website: www.pompeichurch.in) ಹ್ಯಾಚ್ಚ್ ವೆಳಾ ಮಾ। ಡೆನಿಸ್ ಡೆಸಾ ಬಾಪಾಂನಿ ಲೋಕಾರ್ಪಣ್ ಕೆಲಿ. ಹೆಂ ಕಾರ್ಯೆಂ ಕು. ಆರೋಮ ಪೇರಿಸಾನ್ ಚಲವ್ನ್ ವೆಲೆಂ. ಶ್ರೀಮತಿ ಪ್ರವೀಣ ಡಿಸಿಲ್ವಾನ್ ದೇವ್ ಸ್ತುತಿ ನಿರ್ವಾಹಣ್ ಚಲವ್ನ್ ವೆಲಿ. ತಿಸ್ರಿ ಒಡ್ದಿಚಾ ಸಾಂದ್ಯಾಂನಿ ಆನಿ ರೋಸಾ ಮಿಸ್ತಿಕಾ ಕೊವೆಂತಾಚಾ ಧರ್ಮ್ ಭಯ್ಣಿಂನಿ ಇಗರ್ಜೆ ಭಾಯ್ಲ್ಯಾ ಸ್ಟಾಲಾಂತ್ ಅಂಗೊವ್ಣೆಚೊ ವಾತಿ ವಿಕುಂಕ್ ಸಹಕಾರ್ ದಿಲೊ. Y.C.S ಆನಿ P.Y.C ಯುವಜಣಾಂನಿ ಫೆಸ್ತಾಕ್ ಸ್ಟಾಲಾಂ ಘಾಲ್ನ್ ವಿವಿಧ್ ಖೆಳ್ ಆಯೋಜಿತ್ ಕರ್ನ್ ಫಿರ್ಗಜ್ಗಾರಾಂಕ್ ಮನೋರಂಜಿತ್ ಕೆಲೆಂ ಆನಿ ಫೆಸ್ತಾಚೊ ಸಂಭ್ರಮ್ ಚಡಯ್ಲೊ. ಸಾಮಾಜಿಕ್ ಸಂವಹನ್ ಆಯೋಗ್ ಸಾಂದೊ ಶ್ರೀ. ದೀಪಕ್ ಡಿಸೋಜ ಹಾಣೆಂ ತಸ್ವೀರ್ ಕಾಡ್ನ್ ಸಹಕರಿಸಿಲ್ಲೆಂ.